Жаңа қаулы: Маңғыстауда той өткізуге рұқсат берілді

Бұл туралы Қоғамдық коммуникация орталығында өткен брифингіде Маңғыстау облысы санитариялық-эпидемиологиялық бақылау департаменті басшысының орынбасары Асылбек Шаров айтты, деп хабарлайды mangystaumedia.kz.

Оның айтуынша, Маңғыстау өңірі 20 қыркүйек күні «Жасыл» аймаққа кірді. Осыған сәйкес, ведомствоаралық комиссияның шешімімен аймақта бірқатар жеңілдету шарасы қолға алынған. Облыс аумағында карантиндік шектеу шараларын жеңілдету туралы жаңа қаулы 29 қыркүйекте күшіне енеді.

«Жаңа қаулыға байланысты, Маңғыстауда той ұйымдастыруға рұқсат. Бірақ бірнеше талап бар. Біріншіден, мейрамхана міндетті түрде «Ashyq» жобасының қатысушысы болуы тиіс. Келушілердің «Ashyq» жобасындағы мәртебесі «Жасыл» болуы қажет. Сондай-ақ, нысан тек 50% толымдылықпен жұмыс істей алады. Яғни, шараға ең көп дегенде 100 адам ғана қатыса алады», - деді Асылбек Шаров.

Құжатқа сәйкес, «Ashyq» жобасына қатысатын сауда ойын-сауық орталықтары, сауда үйлері мен базарлардың қызметіне еш шектеу жоқ.

«Бұл нысандар өздерінің жұмыс кестесіне сай жұмыс істейді. Ал дәмхана және тамақтану объектілері 70 орыннан асырмай, 50% толымдылықпен жұмыс істейді», - деді Асылбек Шаров.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.