Осыған дейін Маңғыстауда қуаңшылық мәселесін шешу үшін жасанды жолмен жаңбыр жаудыру әдісін қолдану туралы ұсыныс айтылған болатын, деп хабарлайды mangystaumedia.kz.
Бүгін Мәжіліс депутаты, Nur Otan партиясы Фракциясының мүшесі Еділ Жаңбыршин осы жоба бойынша Маңғыстау облысының әкімдігімен арнайы жұмыс тобы құрылғанын жазды.
«Central Asian Center of Climate Change Technologies» компаниясының баспасөз қызметінің ақпараты бойынша Маңғыстау облысында құрғақшылыққа қарсы күрес әдісі ретінде атмосфералық ылғалдан жауын – шашын жаудыруға «Clear Sky Manager» технологиясы қолданылмақ. Осыған орай «Грант Қазақстан» корпоративтік қорының «Central Asian Center of Climate Change Technologies» ЖШС компаниясы мен Маңғыстау облысының әкімдігі арасында 3 жақты келісім шартқа қол қойылды.
Жоба бойынша Маңғыстау облысының әкімдігімен арнайы жұмыс тобы құрылды. Олар бағдарламаның барлық кезеңдерінің нәтижелерін бақылайды, талдайды және бекітеді. Бұл Маңғыстау облысының ауыл шаруашылығына, мал шаруашылығы секторына қатер төндіретін климаттық қиындықтарды жоюға мүмкіндік береді.
Идеяның негізгі мақсаты атмосфералық жауын шашын көлемін орта жылдық есептен кемінде 30% – ға дейін арттыру. Бағдарлама Маңғыстау облысының аумағында 13 ай бойы эксперимент түрінде жүргізіледі. Жобаға бюджеттен қаражат бөлінбейді. Грант Қазақстан корпоративиік қорына жеке инвесторлар арқылы аударылған қаржы арқылы қамтылады.
Маңғыстау облысын су ресурстарымен қамтамасыз ету әдісі сенімді және экологиялық қауіпсіз сондай-ақ әлемдік патенттермен және сертификаттармен қорғалған “Clear Sky Manager” технологиясы пайдаланылатын болады. Бұл табиғи бұлттылықты біртіндеп күшейтуге және атмосфералық жауын-шашынның түсуіне мүмкіндік беретін стационарлық қондырғылар. Яғни, атмосфераға теріс иондар ағыны жіберіліп, соның арқасында жаңбыр кезеңіне жетпеген бұлттар конденсацияланып, жаңалары пайда болады. Қоршаған ортаға, адамдарға, жан-жануарға, ешқандай зияны жоқ. Технология Біріккен Араб Әмірлігі, Иран, Жаңа Зеландия, Ресей және басқа елдерде сынақтан өткен.
Атмосфералық жауын-шашынды арттыру бойынша эксперименттік жұмыстарды климаттық технологиялар саласында 20 жылдық тәжірибесі бар ғалымдар, технологтар және метеорологтардан құралған кәсіби команда жүзеге асыратын болады. Осы шараға қолдау білдірген Маңғыстау облысының жаңа әкімі Нұрлан Асқарұлы Ноғаевқа үлкен рахмет айтамыз!
Сонымен қатар әріптестерім, Мәжіліс депутаттары Самат Мұсабаев пен Елдос Абақанов Маңғыстау облысының әкіміне, Ауыл шаруашылық және Экология, геология және табиғи ресурстар министрлеріне климаттық технологияны Маңғыстау облысының кешенді даму жоспарына кіргізу жөнінде хат жолдадық", деп жазды Еділ Жаңбыршин өзінің фейсбук парақшасында.
Айта кетейік, Мәжіліс депутаттары облысқа келген сапарында Маңғыстауда қуаңшылық мәселесін шешу үшін жасанды жолмен жаңбыр жаудыру әдісін қолдану туралы ұсыныс айтылған. Бұл технология біздің елімізде алғаш рет қолданылмақ. Жоба құны 500 миллион теңгедей болмақ. Оған бюджет қаражатымен қатар кәсіпкерлердің демеушілігі де тартылсын деген ұсыныс жасалған болатын.
Оқи отырыңыз: Қуаңшылық: Жаңбыр жаудыру әдісін қолдану ұсынылды.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
