Маңғыстау облысында жүзеге асатын барлық жобаны бақылауда ұстауға мүмкіндік туды. Жергілікті билік іске асыратын жобалардың бірыңғай базасы жасақталды. Бұл деректер базасында нысандардың құжаты, іске асыру мерзімі мен кезеңі, сондай-ақ қазіргі жағдайы көрсетіледі, - деп хабарлайды mangystaumedia.kz сайты.
Қазірдің өзінде өңір бойынша 1 961 жоба жүктелген. Осылайша республика бойынша алдыңғы қатарға шықты. Бұл туралы бүгін өткен жиында Маңғыстау облысы Жобалық офисінің басшысы Бекмұрат Жүсіпов баяндады.
Ол сондай-ақ мемлекеттік органдардың жобалық басқару жүйесі бойынша апта сайынғы өтетін бағалау қорытындысына сәйкес 11 ұпаймен Маңғыстау облысы көш бастап тұрғанын айтты.
Мемлекеттік жоспарлау жүйесіне жобалық басқаруды енгізуді Ақтау қаласының әкімдігі сәтті жүзеге асырып жатыр. Қала әкімі Нұрдәулет Қилыбайдың айтуынша, қала әкімдігі, қала әкімдігіне қарасты бөлімдердегі мемлекеттік қызметкерлер «ҚР 2025 жылға дейінгі Стратегиялық даму жоспарын» және Маңғыстау облысының 2021-2025 жылдары дамыту бағдарламасын тиімді жүзеге асыру үшін жобалық басқарудың заманауи үлгісі Easy project платформасын қолдануда. Жобалық басқаруға әкімдікте күнделікті іске асып жатқан жобалардан бастап ең ірі инвестициялық жобаларға дейін енгізілген.
«Easyproject жобалық офисі платформасы біршама артықшылықтарға ие екенін көрсетуде. Атап өтсек, жүзеге асырылып жатқан жобаларды қашықтықтан бақылайды. Мемлекеттік бюджетті тиімсіз жаратуға және мақсатсыз жұмсауға жол бермейді. Жұмыс процесінде тиімсіз шешімдерден аулақ болуға жол ашады. Жобаны жүзеге асыруға қатысқан команда құрамын, яғни мемлекеттік қызметкерлерді бағалауға да тиімді құрал. Нұр Отан партиясының республикалық және облыстық, аудандық филиалдарының сайлау алды бағдарламасының орындалуына жүйелі мониторинг жүргізу мүмкіндік береді. Жобаның орындалысы, кімдер жауапты, қашан аяқталатыны, нәтижесі және оның қиындықтары туралы ақпаратты алу. Уақытылы бақылау және бір орталықтан басқару және бір орталыққа бағынған»,-деді Н.Қилыбай.
Бұл басқару жүйесіне облыстық білім басқармасы да өтті. Басқарма басшысы Светлана Тулебаеваның айтуынша, бүгінде Easy project платформасына «Білім саласын дамыту» бағыты бойынша 25 жоба енгізілген. Аталған жбалар жүзеге асқанша барлық деңгейдегі басшылар мен жауапты азаматтардың бақылауында болады.