Сапалы өмір сүру үшін өз денсаулығыңды күтіп, жауапкершілік таныту, ауру белгілері анықталған бойда, кәсіби маман кеңесіне жүгіну аса маңызды. Дерт дендегенде ғана дәрігер іздеу диагнозды дәл қоюға кедергі келтірмек, әрі ағзадағы күрделі биохимиялық үдерістердің тепе-теңдігін теңселтеді. Бұл өз кезегінде өзге дертті қоса жамауына септесіп, ағзаның ішкі мүшелеріне ауыр салмақ салады. Сол себепті диагнозды дөп қою, әрі нақты, мағлұматы бай, ұғынықты кеңес беру жұмысы жоғары деңгейде жүргізілуі тиіс. Маңғыстау облыстық ауруханасының консультативті-диагностикалау емханасы осы бағыттағы қызметін нәтижелі іске асырып келеді. Аталған ұйым директорының орынбасары Фаина Орынбасарова емхананың бүгінгі тыныс-тірлігі турасында мәлімет берді.
«Облыстық аурухана негізінде бой көтерген емхана 2000 жылдан бері тұрғындарға қызмет етіп келеді. Емхана қызметін ұйымдастырудағы басты мақсат кәсіби мамандар тапшы тұста облыс, әсіресе ауылдар мен елді мекендер тұрғындарына көмек қолын созу болатын. Қазіргі таңда өңір халқына тиімді технологияларды қолдану арқылы мамандандырылған медициналық көмек көрсететін емханада 25 тәжірибелі, жоғары білікті дәрігер қызмет етеді. Медицина мамандарының басты қызмет бағыты – кәсіби кеңес беру, ота жасау немесе тұрақты емдеу үшін ауруханға жатқызуға жолдама даярлау, сондай-ақ қажеттілік туындаса науқастың республикалық орталықтарда толықтай тексерістен өту және емделу мүмкіндіктерін қарастырып, іс-құжаттарды жасақтау. Қазіргі таңда емхана дәрігерлері өз міндеттерін мүлтіксіз орындап, көп алғысына бөленіп жүр деуге толықтай негіз бар. Біздің емханада есімдері облыс халқына етене таныс Талғат Мұқантаев – хирург, Гельман және Борис Чагай – нейрохирургтар, Масат Шопан – кардиолог, Гүлжан Қиынова – пульмонолог, Есет Шахатбаев – травмотолог, Полина Молдашева – гастроэнтеролог, Роза Өтепова – инфекционист-гепатолог сынды дәрігерлер қызмет етеді. Сондай-ақ интервенциялық кардиохирург Асылбек Анетов, нейрохирург Думан Мырзабеков, жүрек-қан тамырлары хирургі Ернұр Ордабаев, ортопед Жәнібек Түймебаев секілді облыс бойынша жалғыз кәсіби дәрігерлер біздің ұжымда еңбек етеді. Әрине бұл біз үшін үлкен мақтаныш»,-деп атап өтті емхана директорының орынбасары Фаина Мақсұтқызы.
Сондай-ақ ол маусымның үшінші жексенбісі тойланатын медицина қызметкерлері күніне орай өз тілегін білдірді:
«Дәрігер бойынан даналық пен ізгі адамгершілік қасиет әркез табылуы тиіс. Мейірбан, ақылы-ойы кемел жан ғана адам өмірі мен денсаулығының баға жетпес құндылығын терең бағамдай алады. Мен облыстың денсаулық сақтау жүйесінде қызмет етіп жүрген барлық әріптестерімді, Маңғыстау облыстық ауруханасы ұжымын кәсіби мерекемен шын жүректен құттықтаймын! Ең бастысы деніңіз сау, абыройыңыз биік болсын! Кәсіби өрлеу, көшбасшы ұрпақ тілеймін!».
Голрох Жеменей
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
