Батырдың батыл ұрпағы

«Ауған соғысы» деген атаумен адамзат, оның ішінде Кеңес Одағы тарихынан орын алған 10 жылдық қанды қырғынға сол тұста азаматтық борышын өтеу үшін әскер қатарына шақырылған біздің қазақ жастарының да біразының қатысқанын білеміз. Әрине соғыс шығынсыз болмайды. Ол соғыста да мыңдаған боздақтар қыршынынан қиылып, дұшман оғынан қаза тапты.

Ауған соғысына Маңғыстау облысынан аттанған 444 сарбаздың 8-і интерұлттық борышын өтеу жолында ерлікпен қаза тауып, Сәлімжан Әлиев, Қуатбай Бектұров, Қалмырза Берішбаев, Андрей Кучеренко, Виталий Малышкин, Ахмет Қолдасбаев, Юрий Қоңыров, Адам Мұқылов атты азаматтар Отанға орала алмады.

Ананы баласынан, баланы әкесінен айырған Ауған соғысының көзі тірі ардагерлері бүгінде еліміздің абыройлы азаматтары сапында. Солардың бірі Жаңаөзен қаласы Ауған соғысы ардагерлері кеңесінің мүшесі, 1870 жылғы Маңғыстау көтерілісін басқарған Досан батырдың тікелей ұрпағы Оразалы Мырзақұлұлы Әділов. Оразалы 1961 жылы 15 ақпанда​ дүниеге келіп, 1968 жылы Қызылсай кентінде №4 орта мектепті 1978 жылы бітірді. ​

1978 жылы орта мектепті бітірісімен Өзен бұрғылау жұмыстары басқармасы мекемесінде темір жонушының көмекшісі болып еңбек жолын бастаған Оразалы 1979 жылдың сәуір айында әскер қатарына шақырылып, 1980 жылдың қаңтар айынан 1981 жылдың​ шілде айына дейін Отан алдындағы борышын атқарды.

Әскер қатарына алынған Оразалы Мырзақұлұлы Ақтөбе қаласында дайындықтан өтіп, Мажарстанның (Венгрия) Кишкунмайша жерінде 5-ші жаяу әскер полкінің 4-ротаға қарасты 2-ші взводында гранататқыш болып міндетін өтеп, «Мерген» атағын алады.

Әскери борышын өтеп жүрген Оразалының маңдайына Ауған соғысы тап келіп, 1980 жылы қаңтар айында Душанбеге, одан Термезге жіберіледі. Кеңестік әскери қызметкерлердің базасы Термезден Ауған шекарасына өткен жас жігіт бір жыл алты ай бойы Газни, Гардез, Полоқұмри жерінде тұрған 191 арнайы жасақталған мотоатқыштар полкының құрамында дұшмандармен қоян-қолтық ұрыстарға қатысты.

Ауғанстан соғысында көрсеткен мергендігі мен ерлігі үшін даңқты батырдың ержүрек ұрпағы Оразалы Мырзақұлұлы «Қызыл жұлдыз» ​ орденімен марапатталды. Тегіне тартып туған ұл 2009 жылы 16 желтоқсанда Елбасының Жарлығымен «Айбын» орденін кеудесіне тақты.

Елге аман оралған соң скважиналарды күрделі жөндеу (КАС) және «Жөндеу» мекемелерінде бұрғышының көмекшісі, бұрғышы, шебер болып, еңбек майданына араласты. Қоғамдық жұмыстарға қабілетін танытып, «Фильдсервис» ЖШС мекемесінде кәсіподақ ұйымын басқарды.

Туған ауылының 60 жылдығы қарсаңында Қызылсай аулының 15 жігіттен құралған «Қызылсай қырандары» тобымен бірге жеке кәсіпкерлер Ермек Ғайниев, Алтынбек Жарасовтардың демеушілігімен «Бұрғылау», «Өзенмұнайгаз» мекемелерінің көмегімен «Қызылсай» стелласын тұрғызуға атсалысты.

Оразалы Мырзақұлұлы Жаңаөзен қаласындағы Ауған соғысы ардагерлері Кеңесінің төрағасы қоғамдық қызметін атқарған тұста, жастарды елжандылық, отансүйгіштік бағытқа тәрбиелеуге ықпал етті.

Қазіргі таңда қаланың көпшілік-қоғамдық жұмыстарына белсене араласып жүрген шағын кәсіп иесі. Ел алдында осындай абыройға ие азамат Оразалы биыл алпыстың асқарлы асуына табан тіреп, ​ жұбайы Светланамен бірге 5 бала өсіріп, 8 немере сүйіп отырған асқар таудай ата. ​

Биыл Кеңес әскерінің Ауғанстан жерінен шығарылғанына 32 жыл толу құрметіне өңіріміздің аудан орталықтары мен қалаларында Ауған соғысында қаза тапқандарды еске алу шарасы атап өтілді. Ауған соғысы ардагерлері мен қала тұрғындары жиналғандар соғыста қаза болған сарбаздарды еске алып, ескерткішке гүл шоқтарын қойды. Ел үшін істелген ерлікті ұрпақ ешуақытта ұмытпақ емес.

Үміт ЖӘЛЕКЕ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.