Бүгін облыс әкімі Нұрлан Ноғаев мемлекеттік қызметшілерді кәсіби мерекесімен құттықтады. Жиында жас мемлекеттік қызметшілердің ант қабылдау рәсімі өтті, деп хабарлайды mangystaumedia.kz Маңғыстау облысы әкімінің баспасөз қызметіне сілтеме жасап.
Шарада мемлекеттік қызметті дамытуға елеулі үлес қосқан азаматтар «Үздік мемлекеттік қызметші» төсбелгісімен, облыстың әлеуметтік-экономикалық дамуына үлес қосқан азаматтар Маңғыстау облысының Құрмет грамотасымен және алғыс хаттармен марапатталды.
Осы мерекеге орай қалалық аудандық әкімдіктерінің мемлекеттік қызметшілері арасында ұйымдастырылған шығармашылық сайыс жеңімпаздары және Спартакиадада озық шыққан командалар да марапатталды.
Аймақ басшысы Нұрлан Ноғаев мемлекеттік қызметшілерге үлкен жауапкершілік артылатынын атап өтті.
«Мемлекет басшысы Қасым-Жомарт Тоқаев мемлекеттік қызметшінің оң беделін қалыптастыру үрдісі атқарушы биліктің имидждік саясатымен тығыз байланысты, деп атап өткендей, мемлекеттік қызметші болу – зор құрмет, әрі үлкен жауапкершілік. Кез-келген қоғам мемлекеттік қызметшілерсіз жүйелі жұмыс жүргізе алмасы анық. Халықтың билікке деген сенімі және еліміздің қарқынды дамуы сіздердің білікті білімдеріңізге, мол тәжірибелеріңізге, ерік-жiгерлеріңізге тікелей байланысты», деді облыс әкімі Нұрлан Ноғаев.
Қазіргі таңда Маңғыстау облысында 2421 адам мемлекеттік қызметте еңбек етіп жүр. Оның 54,3%-ы, яғни 1314 қызметкер әйел адам болса, 1107-сі ерлерді құрайды.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
