Ақтаулық көпбалалы ана 6 адамды жұмыспен қамтып отыр

Ақтаулық Динара Көктаубайқызы 29 шағынаудандағы «Жанұя» әлеуметтік қолдау орталығында тігін цехын ашқан болатын. Бүгінде ол алты ісмер әйелді жұмыспен қамтып отыр. Басты мақсат – көпбалалы және аз қамтылған аналарды жұмысқа орналастыру, осы кәсіпті меңгеруіне үлес қосу.

«Ақтау қаласының әкімдігі тарапынан қолдау болып, «Жанұя» орталығынан бөлме берілді. Тігін машиналарын сатып алдым. Менімен бірге 2 көпбалалы ана, 1 мүгедектігі бар ана, 2 асыраушысынан айырылған келіншек жұмыс істеп жатыр. Олардың түрлі киімді тігіп, пішуге қабілеттері мен ынталары жеткілікті. Алдымен төсек-көрпе тіге бастадық. Сосын перделер, балалар киімдері, медициналық халаттар, кейін жұмысшыларға арналған арнайы киімдерден тапсырыстар түсті. Әрқайсысын сапалы етіп жасауға әрі тапсырыс берушілердің көңілінен шығуға тырысамыз», - дейді Динара Көктаубайқызы.

Динараның тігін тігуге деген қабілеті анасынан дарыған. Ол тігіншіліктің қыр-сырын меңгеріп, машықтана бастаған соң арнайы тігін курсына барып, біліктілігін жетілдірген. Қазір қарамағындағы қыздарды үйретіп жүр. Қазір тігін цехында қызмет ететін 7 әйел бар.

Айта кетейік, «Жанұя» орталығында аз қамтылған көпбалалы аналар, жеке кәсібін ашуға ниетті жандар мен өздерін толғандырған мәселелерге байланысты кеңес алуға мүмкіндік бар.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.