Карантин кезінде облыстағы балабақшалар қалай жұмыс істеп жатыр?

Аймақтағы балабақшаларда кезекші топтар ашылды. Тәрбиеленушілерді ата-ананың жұмыс орнынан талап етілген анықтама арқылы қабылдайды. Бұл туралы қоғамдық коммуникация орталығында өткен брифингте Маңғыстау облыстық білім басқармасының басшысы Асқар Сейдалиев мәлімдеді, - деп хабарлайды mangystaumedia.kz сайты.

Өздеріңізге белгілі, 16 наурыздан бастап облыстағы барлық білім беру ұйымдарының кейбірінің жұмыстары қашықтықтан оқыту режиміне өтсе, кейбірінің жұмысы мүлде тоқтатылған болатын.

Ал 7 мамырда жарияланған облыстың бас санитар дәрігерінің «Карантин шараларын өзгерту туралы» №18 ПГСВ қаулысына сәйкес білім беру ұйымдары арнайы ережелерді сақтай отырып жұмыс істейді.

Қазіргі таңда басқарма тарапынан келесі жұмыстарды үйлестіруге тапсырма берілді, олар:

• Балабақша қызметкерлерін COVID-19 вирусына анықтайтын ПЦР анализін анықтау тесттерінен өткізу;
• Балабақшалардағы санитарлық-дезинфекциялық режимді қатаң сақтау, оның ішінде балаларды тәрбиешілердің аула сыртынан қабылдап, тапсыруы, күнделікті жұмыс соңында ойыншықтар мен ыдыс-аяқ, жиһаздарды дезинфекциялауы және т.б. жұмыстар;
• Кезекші топтарда әртүрлі жас топтарының балалары болғандықтан оларды кіші топтарға бөлу және оларға оқу жоспарларын әзірлеу.

Ал Бейнеу, Маңғыстау аудандарындағы балабақшаларды ашуға тауарлар мен көрсетілген қызмет сапасы мен қауіпсіздігін бақылау бөлімдерінен рұқсат берілген жоқ. Басқа аудан, қаладағы 118 балабақшаға 1 803 бала келеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.