Маңғыстаулық сенатор утильалым мөлшерін 150 мың теңгеден асырмауды сұрады

Маңғыстаулық сенатор Бекбол Орынбасаров көлікке қатысты утильалым және алғашқы тіркеу төлемдеріне қатысты Үкімет басшысына депутаттық сауал жолдады, деп хабарлайды mangystaumedia.kz.

Бекбол Орынбасаров еліміздің автопаркін жаңартудағы проблемаларды айтып, кедендік алымдар, кәдеге жарату төлемдерінің мөлшері мен импортпен келетін автомобильдерді тіркеу туралы азаматтардың өтініштері көп екенін атады.

Депутат өз сауалында автокөлік алуға жеңілдетілген несие беру бағдарламасы халықты жаңа автомобильдермен қамтамасыз ету мақсатын орындай алмағанын жеткізді. Сондай-ақ, жаңа және сапалы автомобильдерге қол жеткізудің қиындығы машинаны есепке қоюдағы заңсыздықтың көбеюіне себеп болғанын атады.

«Қозғалтқыш көлемі екі мың текше сантиметрге дейінгі, шыққанына 3 жылдан аспаған автомобильдер үшін утильалым мөлшерін 150 000 теңгеден аспайтындай етіп қайта қарауды сұраймын. Кедендік бажды есептеу кезінде оның көрсеткішін азайту жағына қарай қайта қарау керек. Қазіргі кезде автокөліктердің біразын Қытайдан Қазақстанға Қырғыз Республикасы арқылы әкелінетін фактілер бар. Өйткені автокөлік иелері ҚҚС пен бажды біздің мемлекетімізге қарағанда бірнеше есе аз төлейді. Шығарылған жылын қоса алғанда, бес жылға дейін көлік құралдарын мемлекеттік тіркегені үшін алым мөлшерлемесін 0,25 АЕК көлемінде қарастыруды ұсынамын. Аталған ұсыныстар Қазақстан азаматтарына сапалы және бағасы тиімді автокөліктерді алуға мүмкіндік береді деп сенеміз», - деді Бекбол Орынбасаров сауалында.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.