Қаңтар айындағы ұлттық бірыңғай тестілеу басталғаннан бері 57 мың адам тест тапсырды. Оның ішінде түлектердің 74% – қазақ тілінде, 25% - орыс тілінде, 37 адам ағылшын тілінде тестілеуден өтті, деп хабарлайды mangystaumedia.kz ҚазАқпаратқа сілтеме жасап.
Ғылым және жоғары білім министрлігінің мәліметінше, ҰБТ басталғалы шекті балды 78% жуық талапкер жинады. Орташа балл - 70.
«Тестілеудің үшінші аптасы аяқталды, барлығы штатты режимде өтіп жатыр. ҰБТ 10 ақпанға дейін өтеді. Жалпы, қаңтардағы ұлттық бірыңғай тестілеуге қатысуға 125 мыңға жуық өтініш келіп түсті. Қазіргі таңда тестіленушілердің 19% «Математика-Физика» пәндер комбинациясын тапсырды. Тапсырушылардың 18% «Биология-Химия» комбинациясын таңдаса, 10% шығармашылық емтиханды таңдаған. IT бағыттарға түсуге қажетті жаңа «Математика-Информатика» комбинациясын ҰБТ-ға қатысушылардың 9% тапсырған», – деп атап өтті Ұлттық тестілеу орталығының директоры Руслан Емелбаев.
Талапкерлердің, соның ішінде ерекше білім беру қажеттілігі бар талапкерлердің тестілеуді ыңғайлы тапсыруы үшін ҰБТ тапсыру уақыты 40 минутқа ұзартылған.
Сонымен қатар, олар үшін сызба және диаграммаларсыз сұрақтар жасалды. Қабылданған шаралар арқасында ерекше білім беру қажеттілігі бар 93 бала ҰБТ тапсырды.
Бүгінгі таңда 36 талапкер смартфон, шпаргалка және басқа да тыйым салынған заттарды алып өту әрекеті салдарынан тест тапсыру мүмкіндігінен айырылды.
Тестілеу кезінде ережелерді бұзғаны үшін аудиториядан 57 адам шығарылып, олардың нәтижелері жойылды.
Өзге тұлғалар анықталған жоқ.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
