Елімізде короновирусты жұқтыру 2.3 пайызға өскен

Елімізде COVID-19 вирусынан ем алып жатқан науқастардың көбі – вакцина алмағандар. Бұл туралы Денсаулық сақтау вице-министрі, мемлекеттік бас санитариялық дәрігер Айжан Есмағамбетова мәлім етті, деп хабарлайды mangystaumedia.kz ҚазАқпарат-қа сілтеме жасап.

«Коронавирустан емдеу клиникалық хаттамаға сәйкес жүреді. COVID-19-дың қандай штамы анықталса да, емдеуде бір әдіс қолданылады. Айта кететін жайт, Омикрон штамының ерекшелігі – 96% жағдайда науқас емханада емделеді, қалған 4% жағдайда стационарға жатқызылады. Бүгінде коронавирус жұқтырып стационарға түсетіндердің дені – вакцина алмағандар. Сонымен қатар, созылмалы ауруы барлар және жүкті әйелдер», - деді Айжан Есмағамбетова ОКҚ-де өткен брифингіде.

Вице-министрдің мәлімдеуінше, қазір 1500-ге жуық қазақстандық коронавирустан ем алып жатыр. Оның ішінде 300 пациент стационарлық жағдайда, қалғаны емхана арқылы.

«Қазір өкпені жасанды желдету аппаратында (ИВЛ) 11 адам және 2 науқасқа инвазивті емес жасанды желдету аппараты (НИВЛ) қосылған», - дейді ол.

Бұған дейін министр орынбасары коронавирустың таралу жағдайына тоқталған еді. Айжан Есмағамбетованың айтуынша, желтоқсан айында қарашамен салыстырғанда коронавирус жұқтыру 2,3 есе артқан.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.