Елімізде 26 қайырымдылық мекеменің қызметі тоқтатылды

Алматы қаласының мамандандырылған ауданаралық экономикалық сотының шешімімен 26 қайырымдылық мекемесінің мемлекеттік тіркеуі жойылып, қызметі тоқтатылды, деп хабарлайды mangystaumedia.kz жоғарғы соттың баспасөз қызметіне сілтеме жасап.

Жоғарғы сот «Жібек жолы» қайырымдылық мекемелері қауымдастығының құрамына кіретін 26 заңды тұлғаның мемлекеттік тіркеудің күшін жою және тарату туралы талап қоюды қарады.

Уәкілетті орган тексерісінің қорытындысы бойынша Алматы қаласында қайырымдылықпен және білім беру саласындағы қызметпен айналысатын 26 мекеменің тек 11-і нақты жұмыс істеген, ал 15-і тіркелген жерінде жоқ екені анықталған.

«Олардың қатарында «Ана Аманаты» қыздар мектеп-интернаты, «АМАНАТ әлеуметтік балалар үй-интернаты», «Алмалы» әлеуметтік балалар үйі-интернаты, «Сауран-Ислам мәдени орталығы» және т.б. қайырымдылық ұйымдары бар.

Мекемелерде балалардың өмірі мен денсаулығына тікелей байланысты, соның ішінде көші-қон, еңбек, жер, экология және тұрғын үй мәселелеріне қатысты өрескел заң бұзушылықтар орын алған. Сондай-ақ сәулет, қала құрылысы және құрылыс қызметі, өрт қауіпсіздігі талаптары, санитарлық-эпидемиологиялық нормалар, діни, қайырымдылық және қаржылық-шаруашылық қызмет салаларында бұзушылықтар анықталды», деп жазылған хабарламада.

Іс жүзінде мекемелердің жұмысы олардың жарғылық мақсаттарына қайшы келеді. Оның үстіне, олардың кейбіреулері білім беру қызметін тиісті лицензиясыз жүзеге асырған. Балалардың тиісті білім, тәрбие және дер кезінде медициналық көмек алу құқықтары мен бостандықтары айтарлықтай бұзылған.

Қайырымдылық мекемелерінің діни көзқарасы расталып, ҚР Мұсылмандары Діни басқармасының «Жібек жолы» мекемесімен меморандумы біржақты тәртіпте тоқтатылған. Заң нормаларын бұзған аталған мекемелердің бірқатарына және олардың басшыларына қатысты қылмыстық іс қозғалған (кәмелетке толмағанның өз-өзіне қол жұмсауы, кәмелетке толмаған баланы тәрбиелеу жөніндегі міндеттерді орындамау, әлеуметтік, ұлттық, нәсілдік және діни араздықты қоздыру, сотпен экстремистік және террористік деп таныған әдебиеттерді табу).

Осыған орай, бірінші сатыдағы сот талап қоюды толық қанағаттандырды.

Айта кетейік, кеше Маңғыстауда заңсыз діни дәріс жүргізген қайырымдылық пансионаты туралы жазған болатынбыз.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.