"Bala land" балабақшасының басшылығы күйіп қалған балаға өтемақы төлеуге дайын екенін жеткізді. Қызды балабақшада жуындырып жатқанда ыстық суға күйдіріп алған. Бұл туралы mangystaumedia.kz бұған дейін жазған еді.
Оқиға 26 желтоқсанда түстен кейін болды. Балабақша меңгерушісінің айтуынша, бала ұйқыдан оянған соң күтуші баланы жуындырған.
«Біз күтушілерге балаларды қолғаппен жуындыруға рұқсат бердік. Күтуші қызды жуындыра бастағанда, ол судың ысығанын сезбей қалған. Қыз бала жылаған соң күтуші денесінің қызарғанын байқап, суды бірден өшірген. Содан кейін медбике тексеріп, пантенол жағып жіберген. Мен бірден ата-анасына қоңырау шалып, оқиғаны түсіндірдім. Баланың терісі ғана қызарған, содан кейін ол тыныш ойнап, тамақ ішті. Сол себепті бізде жедел жәрдем шақыруға себеп болмады. Ал кешке әкесі баланы алып кетті», - деді балабақша меңгерушісі.
Балабақша басшысы кешке әлеуметтік желілерден баланың ата-анасы жедел жәрдем шақырып, ауруханаға жеткізілгенін білген.
«Келесі күні баланы балабақшаға әкелмеді, бірақ анасы келді. Біз кешірім сұрадық, өтемақы төлеуге дайын екенімізді айттық. Иә, бұл біздің кінәміз екенін мойындаймыз. Біз күтушіні алдымен жұмыстан шеттетіп, келесі күні келісімшартты бұздық. Қазір үш топта қазандық орнаттық, өйткені бұрын ыстық судың деңгейі өте тез өзгеретін. Енді бәрі жақсы. Келесі күні біз басқа топтарға да қазандық орнатамыз», - деп қосты меңгеруші.