Мұқағалидың туған күніне орай жас ақындар байқауы өтті (ФОТО)

Маңғыстау облыстық Жастар үйінде Мұқағали Мақатаевтың шығармашылығына арналған «Мұқым елдің мұзбалағы» атты жас ақындар байқауы өтті. Маңғыстау облыстық жастар ресурстық орталығымен өткен бұл байқауға мемлекет тарапынан ешқандай қаржы бөлінбеген. Жалпақ жұртқа танымал дарынды ақынның шығармашылығын насихаттау мақсатында жеке демеушілер ұйымдастырған. Сонымен байқауға жоғары және арнаулы оқу орындарының белсенді 14-25 жас аралығында жас ақындар қатысты.

Ақындар байқауында «Шағырлы-Шөмішті» ЖШС мекемесі басшысы және Маңғыстау облыстық мәслихат депутаты Абзал Мендібаев, ақын Асылбек Жаңбырбай, айтыскер ақын Фархад Мұсаев бастаған азаматтар төрағалық етті.

Байқау 2 кезеңнен тұрды:

«Қара өлеңнің құлагері» - қатысушының М.Мақатаевқа арнаған өлеңі.

 2.«Жырлайды ақын жүрек» М. Мақатаевтың  шығармасынан үзінді. (Қатысушы ақын шығармашылығынан бір туынды орындайды)

Ерекше өнерімен көзге түсіп, ақындық шеберлігін танытқаны үшін Алғыс хатпен бір топ қатысушылар марапатталды: Қымбат Таңатарова,  Жомарт Оразов, Болатбек Байпақов, Мәди-Асқар Қанжарұлы.  Сондай-ақ Айдар  Жұмағазы мен  Азамат Алпамысов 3-орынды иеленді. 2-орынды Алтынбек Алибаев қанжығалады. Ал бірінші орынды  Аманжол Жаңай иеленді.  Орын алған қатысушыларға бағалы сыйлықтар үлестірілді.

«Шағырлы-Шөмішті» ЖШС мекемесі басшысы, облыстық мәслихат депутаты Абзал Мендібаевтың айтуынша, әділ қазының қатарынан табылу қиынға соғыпты.

- Ақын болмасам да, жырды жаттап, сүйіп өстік. Байқауға қатысқан 8 жас ақынның тек бір өлеңін тыңдап, баға беру оңайға соққан жоқ. Сондықтан әділ-қазылар арасында қызу тартыс болды. Жастардың бойынан поэзияға деген құштарлық өшпеуі тиіс. Мұндай кештердің көп ұйымдастырылып тұрғаны жақсы, - дейді Абзал Меңдібаев.

Айтыскер ақын Фархад Мұсаев іріктеуден өткен 8 ақынды да талантты деп есептейді.

- Бүгінгі жарыстан 4 ақын суырылып шықты. Өзім үйрететін айтыс-ақындар мектебінен Мәди-Асқар Қанжарұлы есімді шәкіртім қатысты. Оған әлі де көп оқып, тоқу керек. Алда  талай шыңды бағындырады деп есептеймін, - дейді Фархад Мұсаев.

Биыл 9 ақпан күні ақиық ақын Мұқағалидың туғанына 87 жыл толды.

Айгүл ДӘДЕН

Суреттер облыстық жастар ресурстық орталығынан алынды.

[gallery td_select_gallery_slide="slide" ids="48184,48183,48182,48181"]