Оқушылар дәстүрлі сабаққа қосылды

Биылғы оқу жылының үшінші тоқсанынан бастап облыстағы білім мекемелері дәстүрлі оқу үдерісіне көшуді бастады. Ата-аналардың өтініштері негізінде жалпы білім беретін мектептерде 1-5 сыныпқа дейін кезекші сыныптар ашылды. Ал 9-11 сыныптар 70% дәстүрлі, 30% қашықтықтан оқыту форматына көшірілді. Облыс мектептерінде санитарлық шараларды сақтау режимі қабылданған. Санитайзерлермен, тепловизорлармен, бактероцидтік лампалармен, т.б. қажетті құрал-жабдықтармен қамтамасыз етілді. Барлық мектептердегі медициналық пункттер күшейтілген режимде жұмыс істеуде. Ал дәстүрлі сабаққа қайта оралған оқушылардың қуаныштарында шек жоқ. Ата-аналар да бұл күнді көптен күткендерін, балаларының ұстаздар алдында білім алғандарын құптайтындарын жеткізіп, өз пікірлерін айтты.

Жансая Назархан, Ақтау қалалық №21 жалпы білім беру орта мектебінің 9 «А» сынып оқушысы:

Елдегі ахуалға байланысты 2019-2020 оқу жылының IV тоқсанын қашықтан оқып бастап, биылғы оқу жылының екі тоқсанын солай жалғастырдық. Күні кеше 3-тоқсан күндегіден ерекше басталды. Неге дейсіз ғой, біз, расымен, алтын ұя мектебімізді, асыл ұстаздарымызды, жақын достарымызды шын сағындық.

Иә, алдымен, адамзаттың амандығы алдыңғы орында тұрғандықтан және басты байлығымызды бағалай алғандықтан онлайн оқу керек болды. Оның өз алдына қиындықтары да болды. Дегенмен бір қайырлысы – мәжбүрліктен мүмкіндіктерге жол ашып, ақпарат легіне қосылып, технологияның жаңа қырларын меңгеріп алдық. Қашықтан оқу деп үлгерімім төмендеген жоқ, бәріне үлгердім. Ұстаздарым үлгілі оқушы қып мақтауымды асырды. Күрделі мәселеге қарамастан оқушылар білім алуға деген құштарлықтарын жоғалтып алмай, қашықтықтан оқу кезінде білім алуға ашық болды, тәрбиелік шараларда белсенділік танытты. Тіпті мектебімнің талантты, дарынды оқушылары білім додаларында, Абай оқуларында мектептің, қаланың, облыстың атын асқақтатып, көш басында жүрді. Бұл – абырой.

11 қаңтар – мен үшін мерекелі, берекелі күн болып жүрегімде жазылады. Себебі сағындырған мектебіміз, ұстаздарымыз құшағын жая қарсы алды. Сыныптастарымызбен кезекші топпен бөліне оқысақ та, партада отырып, ұстаздың жарқын бейнесін жүзбе-жүз көріп, сабағымыз көңілді нотада басталды. Зейініміз ашылсын, жас достар! Бастысы, ата-анама, ұстазжарыма, достарыма денсаулық, сәттілік тілеймін.

Арайлым Сатжанова, Ақтау қалалық №21 жалпы білім беру орта мектебінің 5 «В» сынып оқушысы:

Мен 2020 жылы бастауыш сыныпты бітіріп, 5-сыныпқа көштім. Бірақ 2020 жылы ел басына төнген қауіпті, болған жағдайды ешкім есінен шығара қоймас. Осыған орай барлық мектеп "онлайн" сабақтарға көшті. Маған "онлайн" сабақтар бірден оңай болды деп айта алмаймын. Бірінші тоқсан онлайн оқуға үйренісумен өтсе, екінші тоқсанда ғана барлығы мен үшін жеңілірек болды. Өйткені мен онлайн сабаққа керек нәрсені үйрендім, технологияның тілін меңгердім. Бәрін үйреніп, біліп алсам да қашықтан оқу көңіліме жақпады, себебі мен өз сыныптастарымды, мектебімді қатты сағындым. Менің арманым мектепке барып оқу еді. Жаңа жылмен, жаңа оқу тоқсанымен бұл арманым да орындалды. Қысқы демалыс біткеннен кейін мектепке барып оқитын мүмкіндік пайда болды. Ата-анам да мектепке баруыма қарсы болмады, керісінше менің қуанғанымды көріп олар мәз болды. Ата-анамның өтініші, өзімнің қалауымның негізінде мектепке барып оқимын. Мектеп табалдырығын аттап, партада отырып білім алғанға ештеңе жетпейді. Мен өте қуаныштымын.

Айғаным Құлынтай, Ақтау қалалық №21 жалпы білім беру орта мектебінің 4 «Ғ» сынып оқушысы:

Мен Ақтау қаласындағы №21 мектептің 4 "Ғ" сыныбында оқимын. Бүгін мен үшін ерекше күн, себебі мен мектепке барамын. Бір жылдай пандемияға байланысты карантин болып, біз сабақты қашықтан оқыған едік. Мен күнде мектепке барып, достарымды көріп, сабақты мектепте оқығым келген. Тілегім қабыл болды. Мектебімді, мейірімді апайларымды, достарымды көруді асыға күттім. Сағыныса көрістік. Бүгін мен өте қуаныштымын. Мектеп іші де оқушылармен, ұстаздармен толып, жанданғандай болды. Білім нәрімен сусындатып, тәрбие беріп отырған №21 мектеп мұғалімдеріне үлкен алғыс білдіремін.

Панакуловтар отбасы

2021 жыл жағымды жаңалықпен басталуда. 11 қаңтардан бастап балаларымыз 3-оқу тоқсанын мектепке барып оқуда. «Қуана білмегенге құт қонбайды, бағалай білмегенге бақ қонбайды», – дейді абыз Әбіш Кекілбаев. Біз өте қуаныштымыз. Ақтау қаласындағы №21 мектептің 3 «В» сыныбында оқитын ұлымыз Жақсылықов Нұрасылдың бұл хабарды естігендегі жүзін көріп, шыны керек, біз де балаша қуанып қалдық.

Балаларымыз бұрынғы қалыптасқан қалыппе мектепке барады, мектеп формасын киеді, ұстаздардан тікелей білім алады. Қуаныш емей не?!

Балаларымыз белсенді түрде сабаққа қатысып, ұстаздардан тікелей, жүзбе-жүз отырып толыққанды білім нәрін алатын болды. Осындай маңызды шешім қабылдап, оны жүзеге асырған білім саласы мамандары мен барлық ұстаздарға алғысымыз шексіз! Мың алғыс сізге, ұстаздар!

Гүлмира Ищанова, ата-ана:

Жаңа жыл, жаңа тоқсан – жақсы жаңалықпен жаршы.11 қаңтардан бастап мектебіміздің дәстүрлі оқытылу форматына көшуіне, мұғалімі мен сыныптастарын сағынып білім ордасына оралатынына 3-сыныпта оқитын қызым Мейрам Сымбат та, біз де өте қуаныштымыз. Дүниеде баланың қуанышынан қымбат, баланың бақытынан басым бақ бар ма?! Біз балаларымыздың алғырлықпен, ерекше ықыласпен жан-жақты білім алатынына сенімдіміз. №21 мектеп балаларға мейлінше бар жағдайды жасап қойды. Ал біз, ата-аналар, барынша санитарлық талаптарды орындайтынымызды ескереміз. Жаңа тоқсанда ұстаздар мен оқушыларға сәттілік тілейміз.

Ләйла Қылышаева, ата-ана:

Ақтау қаласындағы №21 жалпы білім беру орта мектебінде 11-сыныпта, 9-сыныпта және 1-сыныпта оқитын 3 ұлым: Дамир де, Саят та, Дарын да 3-тоқсаннан бастап кезекші сынып бөлінісімен мектептен білім ала бастады. Мектеппен қауышып, ұстаздарымен жүздесіп, достарын көріп арқа-жарқа көңілденгені біздің көңілімізге қуаныш ұялатты. Мектеп табалдырығын аттаған баламыз үшін де, мектеп бітіруші сыныптар үшін де бұл жағдай аса қажет әрі маңызы зор. Осындай қысылтаяң кезеңде кез келген қиынтықтан жол тауып, жарыққа ұмтылу – жүректің ісі. Ұстаздардың еңбегіне, балаларымыздың таным көкжиегіне жеміс тілеймін.

Жайық НАҒЫМАШ