Министрлік итбалыққа тас лақтырғандарға қатысты пікір білдірді

Каспий теңізінде итбалыққа тас лақтырған адамдарға қатысты Экология, геология және табиғи ресурстар министрлігінің Орман шаруашылығы және жануарлар әлемі комитетінің баспасөз хатшысы Сәкен Ділдахмет пікір білдірді, - деп хабарлайды mangystaumedia.kz сайты.

6 шілде күні инстаграм әлеуметтік желісінде демалып жатқан адамдардың Каспий итбалығына тас лақтырғаны туралы видео-сторис пайда болған.

«Видеода көрініп тұрғандай, итбалық адамдарға шабуыл жасау ниетінсіз, қызық көріп жақындаған. Жас әрі ұшқалақ. Итбалықтардың табиғатынан айналаға қызығушылығы жоғары және олар қауіпті емес. Бірақ әрбір жыртқыш жануар өзіне шабуыл жасаса агрессия көрсете алады. Өкінішке қарай, отандастарымыз қауіп тудырмайтын аңға жабайылықпен жауап беріп, тас лақтырған», - деп жазды С.Ділдахмет Facebook-те.

Комитет өкілі азаматтарды табиғатты аялауға шақырды.

«Өзге елдерде дельфиндер, итбалықтар, морждар, тіпті акулалар адамдарға жақын жерде жүреді. Және барлығы бұған үйреніп алған. Достар! Бірлікте өмір сүрейік және табиғатты аялайық. Адам болыңыз!», - деді ол.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.