Бақтыгүл Түркешқызы: Ең күшті мотивация – ата-ананың қолдауы

Өнерге махаббат. Өзіне деген құрмет. Осы екі ұғым Бақтыгүл Түркешқызымен ерекше байланысады. Асқақ арманына адалдық танытқан ол «Х фактор» телевизиялық жобасына қатысып жатыр. Алғашқы іріктеуден өтті.

Осы ретте Жаңаөзен қаласының тумасы, Маңғыстау облыстық филармониясының камералық оркестр әкімшісі әрі әнші, жүргізуші Бақтыгүл Түркешқызымен сұхбаттасқанды жөн көрдік.

– Қайырлы күн, Бақтыгүл Түркешқызы. «Х фактор» жобасының финалына жолдама алдыңыз. Құттықтаймын. Жалпы өнер саласына қалай келдіңіз?

– Өнерге бала кезімнен қызықтым. Осы саланы таңдауыма ата-анамның өнерге деген махаббаты әсер етті. Әкем Түркеш Оңғарова кезінде вокалдық аспап ансамблінің жетекшісі болса, анам Гүлжамал Оңғарова сахнада ән салды. Міне, осы кісілер мені өнерге баулыды, сахнаға дайындады. Содан болар Жаңаөзендегі балалар мектебінде фортепиано сыныбында оқып, музыкалық білім алдым. «Мұнайшы» мәдениет үйінде алғашқы еңбек жолымды бастадым. Өнерге қызығушылығым мені қанаттандырады, сондықтан да шығар әлі сахнадан түскен жоқпын.

– «Х фактор» телевизиялық жобасына қатысуыңызға не түрткі болды?

– Бұл жобаға өзім қатысуға ниет еттім. Бағымды сынап көргім келді. Анам да мені қолдап, «Сен міндетті түрде жеңесін» деп жігерлендірді. Осындай жылы сөздер мен ерекше қолдаудан кейін додаға қатысудан қалай бас тартуға болады. (күліп) Білесіз бе, мен үшін ең үлкен мотивация – ата-ананың қолдауы, ақ тілегі. Енді мен анамның сөзі үшін міндетті түрде жеңіске жетемін.

– Өзіңіз білесіз, 50 жаста үлкен додаға қатысу көп адамға таңсық жайт қой. Тіпті әділқазы алқасы да таңқалып әрі тамсанып қарады. Бұл ретте сіз не ойлайсыз?

– Әрине, 50 жаста екенімді айтқанда барлығы таңдана қарады. Бірақ өнерде шектеу жоқ деп ойлаймын. Жобаның шартында да қатысушылардың нақты жасы көрсетілмеген екен. Бойда талант барда мүмкіндігімді пайдалануды жөн көрдім. Егер адамның мақсаты айқын болса, кез келген тосқауыл оған кедергі бола алмайды. Менің арманым – үлкен сахнада өнер көрсету, оны бағындыру, көрермендердің қошеметіне бөлену. Сол себепті де тәуекелге бел буып, алға қадам бастым.

– Жобаның келесі кезеңі қашан болады? Дайындықты бастап кеткен боларсыз...

– Финалға 9 адам жолдама алды. Келесі кезең қаңтарда басталып, ақпан айына дейін жалғасады. Әр сенбі күні «Еуразия» телеканалында жергілікті уақытпен 19:00-де тікелей эфир көрсетіледі. Осы ретте менде дайындығымды бастап кеттім. Әзірге барлығы сәтті өтіп жатыр. Желтоқсан айының соңында Алматыға жол жүремін. Әрі қарай дайындықты сол қалада жалғастырамын. Байқауда көрермендердің дауысына басымдық беріледі. Сондықтан жерлестерімнен әрдайым қолдау күтемін.

– Бақтыгүл Түркешқызы, сұхбатыңызға рақмет. Алдағы уақытта сізге сәттілік және жеңіс тілеймін!

Сұхбаттасқан Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.