Мәжіліс депутаттары «Мұнайтелекомда» болды

Маңғыстау облысы – еліміз үшін елеулі, алар орны маңызды аймақтың бірі. Өңірдегі әлеуметтік мәселелер, қоғамдық пікір және Елбасымыз Н.Ә.Назарбаевтың Жолдауы негізінде алға қойылған жобалардың қаншалықты дәрежеде орындалып жатқанын бақылап, түрлі кездесулер арқылы халықпен сұхбаттасу алаңын ұйымдастыру мақсатында ҚР Парламент Мәжілісінің депутаттары Маңғыстау облысына арнайы жұмыс сапарымен ат басын бұрды. Күн тәртібіндегі ең алғашқы мін­дет – халық қалаулыларының Елба­сы Нұрсұлтан Назарбаевтың қазан айындағы Қазақстан халқына арналған ке­зекті Жолдауында бағдар етіп қойылған «Қа­зақстандықтардың әл-­ауқатының өсуі: табыс пен тұрмыс сапасын арттыру» жолында ат­қарылып жатқан қоғамдық істерге жұртшы­лықты кеңінен тартып қана қоймай, тереңдете түсіндіру. Денсаулық сақтау саласы мен «Нұр Отан» партиясының Маңғыстау облыстық филиа­лының өкілдерімен өткен жиындардан соң Мәжіліс депутаттары «Мұнайтелеком» ЖШС­да бастауыш партия ұйымдарының жұмысын талқылау негізінде кездесу өткізді. Шараға «Нұр Отан» партиясы Ақтау қа­лалық филиалының өкілдері мен бастауыш партия ұйымдарының мүшелері, жастар және аталмыш мекеменің қызметкерлері қатысты. Ең бастысы, биыл «Жастар жылынан» күтер үміт көп. Жастарға кең серпілуге мемлекет тарапынан зор мүмкіндіктер беріліп отыр. ҚР Парламент Мәжілісінің депутаты Зәуреш Аманжолова «7-­20­-25» бағдарламасының жас­тар үшін тиімділігін ерекше атап айтып берді. Облысымыздағы деректерге жүгінсек, аталған бағдарламамен баспана алғандардың 80 па­йызға жуығы – енді ғана шаңырақ көтерген жас отбасылар. Биылғы «Жастар жылы» жайында депутат Геннадий Шиповских сөз сөйлеп, жас мамандардың сұрақтарына жауап беріп, жастардың айтқан ұсыныстарын қабыл алды. - «Жастар жылын» жариялап, оларға түрлі бағытта мүмкіндіктер тудырып отырғанымыз – өскелең ұрпақтың жолын ашуға жасаған мемлекеттің үлкен қадамы. Аңдасаңыздар, дүниедегі адам таңданарлық нәрселердің кө­бін жасампаздар жастық шағында қалыптас­тырып үлгерген. Ерлік, өркениет дамуының өзінде жастық шақтың жалыны мен толассыз шабытының көрінісі жатыр. Өнертапқыш ға лымдардың жасап шыққан дүниелерін әлем­дік нарыққа шығару, шығармашылық жас­тарға байқаулар ұсыну, жас кәсіпкерлерді қолдау, спорт кешендерін тұрғызу арқылы жас буынды ширақ болуға баулу, жұмыссыз жандарды қоғамдық жұмыстарға жұмылды­ру секілді сансыз игіліктердің бәрі – тек қана жастар үшін. Қабілетін уақытында көрсетіп, бұл мүмкіндіктерді пайдалана алған жастар келешек елдің тірегі бола алмақ, – деп жас мамандардың келешегі үшін қаншалықты жарқын сәттер тудыра алатынын депутат Ген­надий Шиповских ерекше айтып өтті. Әлеуметтік мәселелер жайында Мәжіліс депутаттары Бақытбек Смағұл, Шавхат Өтемісов, Валихан Қайназаров сөз қозғады. Осы күні ортамызда саяқтанып бара жатқан ардагерлердің сарқыты әлі де баршылық. Соғысты жан баласының басына бермесін, десек те соғыста ерлік жасай білген жандарды қоғам болып демеп, қанаттандырса да артық емес. - Осы күні әр облыстағы ардагерлермен қашықтан болса да хабарласып, күрделі мә­селелері болса, қолымыздан келгенше шешіп беруге тырысамыз. Ұрпаққа ерлікті дәріптеуге тиіспіз. Жаңа қадамдарды жасауда бабалар­дың ерлік үлгісі көпке демеу, – деп Бақытбек Смағұл ардагерлер мәселесіне әлеуметтік тұр­ғыдан назар салды. Халық қалаулылары аталған мәселелермен ғана шектеліп қалмайды. Қоғам арасындағы маңызды деген бағыттар бойынша Мәжіліс депутаттары көптеген аудандар мен қалаларды аралап, өз кезегінде жұртшылықпен кеңеспек.

Мадияр ТӨЛЕУОВ