Былғары қолғап шеберлері оқушылармен кездесті

Ақтау қаласындағы «Оқушы орталығының» жанынан құрылған «Ақжелкен» аула клубы елімізге танымал боксшылар Әділбек Ниязымбетов, Берік Әбдірахмановпен тағылымды кездесу өткізіп, оқушылардың еркін пікір алмасуына жағдай жасады. Кездесу барысында былғары қолғап шеберлері оқушылардың қойған сұрақтарына жауап беріп, жас спортшылардың қойылымын тамашалады.

«Ақжелкен» аула клубының ұйымдастырушы-педагогы Амангүл Жылгелдиеваның айтуынша, бүгінде балалардың түрлі үйірмелерге қатысып, ұнаған спорт түрлерімен айналысуларына барлық жағдай жасалған. Облыс орталығында ұдайы  мәдени-бұқаралық және спорт­тық іс-шаралар өткізіліп тұрады. Қаламызда болашағынан зор үміт күттіретін жас спортшылар қатары да көбейіп келеді.

- Біздің клубта каратэ, таэквондо, кикбоксинг, сондай-ақ туризм және жас физик үйірмесі жұмыс жасайды. Клубқа тұрақты келіп спортпен айналысып жүрген 400-ге жуық оқушы бар. Жастарға тәлім-тәрбие беріп жүрген Қуанғали Дастанұлы, Сағындық Сариев, Сәуірбек Жаңабаев, Балнұр Орынбасарова және Ермек Асанов сияқты қызметкерлердің еңбегі жоғары. Олар білім саласының дамуына және өскелең ұрпақты тәрбиелеуде үлкен жұмыстар атқарып жүр, - дейді Амангүл Жылгелдиева.

Кездесуде сөз алған Әділбек Ниязымбетов пен Берік Әбдірахманов өздерінің спортта жеткен жетістіктері мен жеке өмірі туралы әңгімелеп берді. Оқушыларға салауатты өмір салтын сақтап, спортпен айналысуды насихаттаған былғары қолғап шеберлері ең бастысы-өмір рингінде есені жібермеуге тілек білдірді. Тынымсыз еңбек етіп, алдыңа қойған мақсатың айқын болса ғана үлкен жетістіктерге қол жеткізуге болатындығын айтты.

-Нәтижеге қол жеткізу үшін ұдайы спортты насихаттау қажет, сонда ғана дене шынықтыруға қызығатын жастар қатары артары сөзсіз. Бос уақытын стадион, спорт залдар мен ойын алаңдарында өткізетін жастар қатардың қатары жыл санап көбейіп келеді. Олардың арасынан түбек намысын республикалық, халықаралық жарыстарда қорғайтын спортшыларымыздың шығары анық,-дейді кездесуде сөз алған Әділбек Ниязымбетов.

Аға буынға еліктеп, чемпион болуға талпынған жас спортшылар кездесу соңында танымал спортшылардан қолтаңба алып, естелікке суретке түсті.

Венера МИРЛАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.