Мұнайлыда жол апатын жасаған жүргізуші бір жарым жылға бас бостандығынан айырылды

Мұнайлы аудандық соты жол-көлік оқиғасын жасаған жүргізушіні 5 жылға көлік басқару құқығынан, бір жарым жылға бас бостандығынан айырды, деп хабарлайды mangystaumedia.kz Мұнайлы аудандық сотының баспасөз қызметіне сілтеме жасап.

Сотталушы «Toyota 4Runner» автокөлігімен «Ақтау-Жаңаөзен» орталық жолында оң жақ жолақта автокөлік келе жақанын көріп, жол беру үшін тежеуішті басқан. Содан кейін басқару жүйесін игере алмай, жол жиегіндегі қоршауға соғылып, жол-көлік оқиғасын жасап тұрған «Lexus ES 300» автокөлігі мен жүргізушісін соққан. Ал Lexus ES 300 жүргізушісі есін жимастан қайтыс болған.

Сотталушы А тағылған айыппен келісіп, кінәсін мойындап, бас бостандығынан айырмайтын жаза түрін тағайындауды сұраған. Жәбірленуші тарап сотталушыға кешірім беретінін, бас бостандығынан айырмайтын жаза тағайындауды сұраған.

- Сот сотталушының кінәсін мойындауы мен өкінуін, бұрын қылмыстық жауапкершілікке тартылмағанын, асырауында кәмелетке толмаған төрт балаларының болуын қылмыстық жауапкершілікті жеңілдететін мән-жайлар деп таныса, қылмыстық жауаптылығы мен жазасын ауырлататын мән-жайлар анықталған жоқ. Сот үкімімен А. ҚК-нің 345-бабының 3-бөлігімен кінәлі деп танылып, оны көлік құралын басқару құқығынан 5 жылға айыра отырып, оған 1 жыл 6 ай мерзімге бас бостандығынан айыру жазасы тағайындалды, - делінген Мұнайлы аудандық сотының үкімінде.

Сот үкімі заңды күшіне енген.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.