Маңғыстауда теңіз туризмін дамытуда мәселе көп

Маңғыстауда теңіз туризмін дамытуға кедергі келтіретін заңда бірқатар қайшылық бар. Туристік флотқа айтарлықтай салмақ бар. Су шекарасына қатысты да түсінбестік жетерлік. Салдарынан бизнес пен құзырлы органдар жиі қақтығысады. Осы мәселе Маңғыстау облысы кәсіпкерлер палатасында өткен жиында талқыланды, - деп хабарлайды mangystaumedia.kz «Атамекен» кәсіпкерлік палатасының баспасөз қызметіне сілтеме жасап.

Климаттық жағдайы жылдың 9 айында саяхаттауға мүмкіндік беретін Маңғыстауда сұранысқа ие орын — Каспий теңізінің жағалауы. Көк айдында шомылып, су көліктерімен серуендеуге сұраныс көп. Бірақ теңіз туризмімен айналысатын кәсіпкерлер қолданыстағы заңдарда кедергі көп екенін айтады. Шағын туристік флотқа алып жүк кемелерінің талаптары қойылған. Бұдан бөлек «Мемлекеттік шекара туралы» заң талабында су көліктері тұратын аумақ қоршалып, қорғалуы тиіс. Ал, жергілікті әкімдік бұған қарсы. Олардың шешімінде теңіз жағасы қоғамдық орын деп саналады. Көпшілікке ортақ болғандықтан еркін кіріп-шығу үшін үнемі ашық тұруы керек.

«Теңіздегі су көліктерінің әр алуандығын ескеріп, еуропалық талапты енгізбесе болмайды. Теңіз жағасынан көп ұзамайтын шағын қайықтар мен жүк тасымалдайтын алып кемелерге талап ортақ. Бұлай әділетсіз ғой. Заңдағы қарама қайшылықтар салдарынан құзырлы органдар бизнестің алқымынан алады», — дейді кәсіпкер Сергей Ворожейкин.

Бұдан басқа туристік нысандарға саяхатшылардың жетуі қиын. Тас жолдардың жоқтығы, жол азабы туристердің қызығушылығын жоюы мүмкін. Бұл мәселелер «Атамекен» ҰКП-ның өкілдеріне де айтылды. Олар өз деңгейінде мәселеге араласып, Үкіметке дейін жеткізбек.

«Атамекен» ҰКП Төралқасы туристік сала комитетінің төрайымы Юлия Якупбаева былай дейді:

«Кейбір заңдарға өзгерістер енгізу туралы Премьер-министрдің орынбасарына жеткіземіз. Мұны ведмоство аралық комиссия деңгейінде көтеруге күш саламыз. Туризмдегі өзге де мәселелерді тиісті министрліктермен шешуге ықпал етеміз. Әзірбайжан және Ресеймен бірлескен жолаушылар туризмін жолға қоямыз».

Каспий жағалауы туризмнің қарқынды дамуы үшін қолайлы аумақ ретінде үлкен жобаларға енген. Қазір өңірде көк теңізді жағалай 19 туристік нысан орналасқан. Олар: демалыс базалары, қонақ үйлер мен ойын-сауық орындары. Өткен жылы облысқа 160 мың турист келіп-кеткен. Биылғы 6 айдың өзінде 139 мың адам саяхаттады. Бұл көрсеткіштерді еселей түсу үшін әлі көптеген мәселенің түйіні шешілуі керек.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.