Түпқараған тұрғынынан 51 келі бекіре балығы тәркіленді

Жақында Маңғыстау облысы Полиция департаменті табиғатты қорғау полициясының қызметкерлері Түпқараған тұрғынынан 51 келі бекіре балығын тәркіледі, - деп хабарлайды mangystaumedia.kz сайты.

Полиция қызметкерлері сағат шамамен 18:45-те күдіктінің үйін тінту кезінде сарайдан жалпы салмағы 51 келі болатын 15 бекіре балығы бар мұздатқышты тапқан.

Департамент баспасөз қызметінің айтуынша, бұл факті бойынша ҚР Қылмыстық кодексінің 339-бабының 1-бөлігі бойынша (сирек кездесетін және жойылып кету қаупі төнген түрлермен, сондай-ақ тыйым салынған өсімдіктер мен жануарлар түрлерімен, олардың бөліктерімен немесе туындыларымен заңсыз жұмыс жасау) сотқа дейінгі тергеу басталды.

Ал тәркіленген балық «Қазақ Осетр ғылыми -өндірістік кәсіпорны» ЖШС -не берілді.

"Сотқа дейінгі тергеу жалғасуда. Бекіре - Қызыл кітапқа енгізілген балық. Мұндай балықты аулауға ел заңы бойынша тыйым салынған", - деді Маңғыстау облысы Полиция департаментінің бастығы Жанарбек Бақтыбаев.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.