Маңғыстауда 319 жазғы сауықтыру орны оқушыларды қабылдауға дайын

©

Кеше Маңғыстау облысының әкімі Ералы Тоғжановтың төрағалығымен кезекті аппарат жиыны өтіп, күн тәртібінде аймақ дамуындағы маңызды мәселелер қаралып, түйткілді тақырыптар талқыланды. Ақтау теңіз порты арнайы экономикалық айма­ғын дамыту мәселелері жайында «Ақтау теңіз порты» АЭА АҚ өкілі Саян Бейсенғалиев ба­яндама жасады. «Біздің порт бойынша инвестицияның жалпы көлемі 98,5 млрд. теңге, оның ішінде шетел инвесторларының көлемі 50,5 млрд. теңгені құрайды. Өндіріс көлемі – 31 млрд теңге. Бюджетке түсетін салық көлемі – 25,4 млрд. теңге. Бүгінгі күнде бізде 9 жоба іске асырылу үстінде. Оның ішінде 2019 жылға 6 жоба жоспарланған. Құны 19 млрд теңгені құрайтын бұл жобалар арқылы 364 жаңа жұмыс орны ашылады. Тағы 73 млрд. теңге қаражатқа 365 жұмыс орнын қамтитын үш жобаны 2020­-2021 жылдары жүзеге асыру жоспарланған. Қазіргі уақытта үш ірі инвес­тор жобасын қолға алып отырмыз. Соның бірі Westgasoil PTE.LTD жобасы аясында 76 млрд. теңге инвестиция тартылады және 6 500 жұмыс орны ашылмақ», – дейді С.Бисенғалиев. Оның айтуынша, Ақтау теңіз порты бойынша West­gasoil PTE.LTD жобасынан бөлек, мұнай өндірісі және геологиялық барлау құрал-­жабдықтарымен айналысатын «Эверест Техно» ЖШС, сондай­-ақ сорғы штангаларын әзірлейтін «Техногран-Ақтөбе» ЖШС жобалары бар. «Биыл алғашқы тоқсанда біздің жобаға қатысушыларымызға қатысты 50 қатынас болды, оның әрбіріне қатысты тиісті шаралар қабылданды. Сонымен қатар осы уақыт аралығында 4 меморандумға қол жет­кізілді. Екі республикалық форумға қатыстық. Ал түйінді мәселеге келер болсақ, арнайы эконо­микалық аймаққа кіретін темір жолдың қиғаштығы мәселесі шешімін таппай тұр», – дейді сөз соңында С.Бисенғалиев. Маңғыстау индустриялық аймағын дамыту мәселелері де – өңірдегі өзекті міндеттердің бірі. Бұл туралы аппарат жиынында «Маңғыстау индустриялық паркі» ЖШС директоры Ерлан Әубәкіров айтып берді. «Индустриялық аймақ мемлекет та­рапынан жекелеген секторларға қолдау көрсету мақсатында құрылды. Бүгінгі күнде индустриялық аймақ паркі терри­ториясы бойынша әр түрлі бағыттағы 9 кәсіпорын бар. 19 мың шаршы метр жер жалға берілді. Индустриялық аймақта инвестициялық жобаларды жүзеге асыру жаңа өндіріс орындарын ашуға оңтайлы болмақ. Қазіргі таңда комиссиядан өткен 5 жоба жоспарға алынып отыр және іске асыруға дайын», – дейді Ерлан Аймұрзаұлы. Оның айтуынша, 2018 жылы индустриялық парк аумағында 998 млн. теңгені құрайтын 9 жоба қолға алынып, ол өз кезе­гінде 121 жаңа жұмыс орнын ашуға сеп болды. Биыл тағы 1,2 млрд. теңге қаражатқа 170 жұмыс орнын қамтитын 5 жоба жасақталып отыр. Аппарат жиынында Маңғыстау облысында жазғы ка­никул кезінде балалардың сауықтыру демалысын, бос уақыты және іспен шұғылдануын ұйымдастыру мәселелері жайында облыстық білім басқармасының басшысы Асқар Сейдалиев баяндады. Оның сөзінше, биыл мектеп оқушыларының жазғы демалысында 16 демалыс ныса­ны әзірленбек. Жалпы саны 319 балаларды сауықтыру орындары бар. «Биыл балалар «Балдәурен», «Фламинго», «Алау», «Ақбөбек» демалыс орындарына барады, сондай­-ақ мектеп жанынан 89 демалыс, 102 кәсіптік, 124 палаталық спорттық киіз үй лагері ұйымдастырылады. Облысымызда 23 мың көп балалы ана болса, 8 мың мектеп жасындағы әлеуметтік аз қамтылған оқушы бар. Олардың барлығына да тиісті жағдайлар жасалып, жазғы демалыстарын жақсы өткізуге мүмкіндіктер беріледі. Жазғы демалыс аясында туризм бағыты бойынша 3 күндік саяхат, 10 маршруттық жорық бойынша экскурсия ұйымдастырылады», – дейді басқарма басшысы. Сонымен қатар оқушыларға жазғы демалыс кезін­де «Өз жеріңді танып біл» және «Демалыс күнгі сая­хат» жобасы да ұсынылады. Биыл 33 036 бала спорттық жиындарға, 46 229 бала аула клубтарына, IT сынып­тар мен робототехника үйірмелеріне және 31 527 бала еңбекпен қамту бағытындағы еңбек отрядтары мен «Жа­сыл ел» бағдарламасына тартылмақ. Сондай-­ақ 22 072 бала танымдық бағыттағы «Жасұлан», «Жас қыран» мек­тептері, тілдік лагерьлер және дебаттық үйірмелерге жол­дама алады. Осы ретте аймақ басшысы Ералы Тоғжанов оқушылардың жазғы демалыстарында теңіз жағасында жоғары деңгейде лагерьлер ұйымдастыру мәселесін тап­сырды. Жиын соңында облыс әкімі күн тәртібінде көтерілген мәселелер бойынша тапсырмалардың орындалуын тиісті мекеме басшылары мен өкілдеріне қатаң міндеттеді.

Жайық НАҒЫМАШ