Қазақстанда ең көп орташа жалақы - Маңғыстауда

©

Қазақстан Республикасы бойынша ең көп орташа жалақы Маңғыстау облысында. Маңғыстаудағы орташа жалақы көлемі бір жыл ішінде 14% өсіп, 282 мың теңгеге жетті, - деп хабарлады Baq.kz ақпарат агенттігі.

Сондай-ақ жалақы бойынша лидерлер қатарына Атырау облысы (279,9 мың теңге, +9,2%), Астана (223,5 мың теңге, +9,9%) және Алматы (187,8 мың теңге, +4,4%) қалалары кірді. Ал жалпы Қазақстан бойынша 2018 жылдың І тоқсанында орташа жалақы 152,4 мың теңге болды. Бұл өткен жылмен салыстырғанда 8,7% көп.

Қазақстандықтардың сатып алу қабілетінің 2015 жылдың І тоқсанынан бері алғаш рет өсіп отырғанын айта кетуіміз керек.

Ең көп жалақыны сақтандыру және қаржы саласындағы мамандар (І тоқсан қорытындысы бойынша 299 мың, бір жылда +2,8%) алып жүр. Сондай-ақ, бұл тізімде ғылыми және техникалық салада жүргендер (255,1 мың теңге, бір жылда +7,2%) бар.

Өнеркәсіп саласындағы мамандардың орташа жалақысының көлемі 223,3 мың теңгеге (бір жылда +11%) жетті. Алайда кен өндіру саласындағы жұмысшылар бірден 366,2 мың теңге алады. Бұл өткен жылмен салыстырғанда 13% көп.

Естеріңізге сала кетсек, 2017 жылдың қорытындысы бойынша, қазақстандықтардың орташа жалақысы 149,7 мың теңге немесе 459 АҚШ доллары болған еді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.