Сайөтес ауылында коворкинг кітапхана ашылды

“Жол картасы -2020” бағдарламасы аясында Сайөтес ауылындағы Өтес мектебінің кітапханасы жабдықталып, коворкинг орталығы болып ашылды. Басты мақсат кітапхананы оқушылар үшін зияткерлік демалыс орнына айналдыру. Ойын, білім, ғаламтор, өлкетану және кітап оқу алаңына бөлінген коворкинг енді оқушылардың сүйікті жеріне айналмақ.

- Кітапхана қоры ғылыми әдебиеттермен, анықтамалар, қазақ және әлем әдебиеті көркем шығармалармен толықтырылған. Кітап оқу тәжірибесінен алынған кітап оқу алаңында балалар жұмсақ дивандарға отырып кітап оқиды, демалады. Оқыған кітаптары бойынша ой бөліседі, талдайды. Коворкинг-кітапхана ашу 2020 жылдан бастап ойымызда жүрді. Өркениет көшіне ілесу – мақсат. Бүгінде барлық кітаптар цифрлы форматқа көшірілуде. Енді балалар үшін электронды каталогтарды интернетке шығарып, кітапхана сайтына орналастырамыз. Электронды каталог өте тиімді. Оқырман осы жүйе арқылы керек кітабын таба алады,- деді Өтес мектебінің директоры Гүлсім Нәдірова.

Өтес орта мектебінің оқушысы 3-сынып оқушысы Аянат Қосымбай аптасына 3 рет кітапханаға келіп кітап оқиды. Ол кітапхананың заманауи құралдармен жабдықталып, коворкинг орталығына айналғанына қуанышты.

— Ауылымыздағы балалар кітапханасына аптасына екі-үш рет келіп, өзіме қажетті кітаптардың барлығын алып оқитын едім. Енді коворкинг орталығына тіптен жиі келетін болдым. Себебі, бұрынғыдан да қызықты құрал-жабдықтар орнатылды. Тіпті, сыныптастармен бірге отырып, мультифилмьдер көруге және ойын ойнауға болады. Осындай жаңаша мүмкіндік жасап жатқан ұстаздарымызға алғыс айтамын,- деді Аянат Қосымбай.

Аз ғана уақыттың ішінде балалардың сүйікті жеріне айналған коворкинг орталығы оқушылардың білімін жетілдіріп қана қоймай бос уақытын тиімді ұйымдастыруға да зор септігін тигізуде.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.