«Маңғыстау-Медиа» ЖШС ұжымы жылды қорытындылады

Бүгін «Маңғыстау-Медиа» ұжымы жылды қорытындылап, үздіктерді марапаттады, деп хабарлайды mangystaumedia.kz.

Маңғыстау баспасөзінің қарашаңырағы саналатын «Маңғыстау-Медиа» ұжымын облыс әкімінің орынбасары Звира Түгелқызы құттықтап, өңірдің дамуына БАҚ арқылы қосып жүрген үлестеріне алғысын жеткізді.

Маңғыстау облысының әлеуметтік-экономикалық дамуына қосқан үлесі үшін облыс әкімі орынбасарының Алғыс хатымен «Маңғыстау» газетінің тілшісі Жайық Нағымаш, Ақкүміс Түркамбаева, заңгер Айнұр Таджибаева, «Огни Мангистау» газетінің тілшісі Айдана Хамитова, «Рауан» газетінің тілшісі Үміт Қаздаева, жүргізуші Исмағұл Қойбағаров, жарнама бөлімінің маманы Айнұр Жәңгірбаева марапатталды. Сондай-ақ, «Ақтау қаласына – 60 жыл» мерекелік медалімен Гүлсара Нығметова марапатталды.

«Маңғыстау-Медиа» серіктестігінің директоры Гүлмира Әбішева 2023 жылдың медиахолдинг үшін табысты болғанын айтты.

«Қоян жылы "Маңғыстау медиа" ұжымы үшін табысты аяқталғалы тұр. Ауыз толтырып айтатын жетістігіміз өте көп. Биыл өңірдің төл басылымы "Маңғыстау" газеті 50 жылдығын, "Маңғыстау медиа" ЖШС 10 жылдығын жоғары деңгейде атап өтті. Ардагер журналистер мен басылымдағы қаламгерлердің еңбегін кейінгі ұрпаққа насихаттау мақсатында музей бұрышын аштық.

Сондай-ақ еңбекақы көлемі өсіп, бірнеше жыл тоқтап қалған қаламақы жүйесін қайта жаңғырттық. Подкаст студия жасақталып, әлеуметтік желідегі оқырман саны бірнеше есеге артты. "Маңғыстау медиа" ұжымының журналистері республикалық, облыстық жарыстарда топ жарып жүр», деді медиа директоры.

Гүлмира Әбішева болашақта медиахолдинг аясында радио мен жаңа ақпараттық сайт ашуды жоспарлап отырғанын жеткізді.

Салтанатты шара барысында баспасөздің дамуына қолдау көрсетіп жүрген «ҚазАзот», «Өзенмұнайгаз» компаниясы, Yessenov University, Маңғыстау облыстық соты, Маңғыстау облыстық прокуратурасы мен бірқатар азаматтар серіктестік директорының алғыс хатымен марапатталды.

«Маңғыстау» газетінің журналисі Үміт Қашаубаева «Жыл жаңалығы» номинациямен марапатталды. Биыл Үміт Қашаубаева «Жаңаөзен қаласының Құрметті азаматы» атанды.

Биылғы баспасөзге жазылу науқанында үздік көрсеткіш көрсеткен «Жаңаөзен», «Қарақия» «Рауан» газетінің редакциялары марапатталып, сыйақы берілді. Сонымен қатар, жыл бойы үздік нәтиже көрсетіп, белсенді болған медиа журналистері әртүрлі номинациялар бойынша марапатталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.