Қалам иелерінің кәсіби мерекесі қарсаңында Маңғыстау түбегінде әйелдер арасынан шыққан алғашқы кәсіби журналист Шарай Батырбайқызы атындағы сыйлықты табыстау рәсімі өтті, деп хабарлайды mangystaumedia.kz.
ҚР Журналистер Одағы Маңғыстау облыстық филиалының ұйымдастыруымен өткен шараға Шарай Батырбайқызының ұрпағы мен өңір журналистері қатысты.
ҚР Журналистер одағының Маңғыстау облысындағы филиалы төрағасы, «Маңғыстау-Медиа» ЖШС директоры Гүлмира Әбішева өңір баспасөзін өрге сүйреген тұлғаларды таныту елдік іс екенін, ал олардың еңбектерін өміршең ететін жас ұрпақты осындай игілікті бастамалармен ынталандырып отырудың маңыздылығын атап өтті.
– Киелі Маңғыстау текті де талантты ұл-қыздарға кенде емес. Сондай айтулы тұлғалардың бірі - қазіргі «Маңғыстау-Медиа» ЖШС-нің құрамындағы «Жаңа өмір» газетінде отыз жыл еңбек етіп, облыс баспасөзінде үлкен қолтаңба қалдырған журналист, 12 баланы тәрбиелеп өсірген Батыр ана Шарай Батырбайқызының есімін, артында қалдырған ізін өскелең ұрпаққа жеткізу, насихаттау бүгінгі қалам ұстаған қауым үшін қасиетті парыз деп білемін. Шарай Батырбайқызы атындағы сыйлықты оның ұрпағы өткен жылдан бастап тағайындаған болатын. Бүгін сол игілікті іс жалғасын тауып, нағыз дарын иесіне осы марапатты табыстаймыз, - деді ҚР Журналистер одағының Маңғыстау облысындағы филиалы төрағасы Г.Әбішева.
Ш.Батырбайқызы ҚазҰУ-дың журналистика факультетін бітірген, 1960 жылдан ширек ғасыр бойы Маңғыстау ауданы «Жаңа өмір» газетінде әдеби қызметкер, бөлім меңгерушісі, жауапты хатшы болып істеген кәсіби журналист. Түбектің сан салалы мәселелері жөніндегі мақалалары мен хабарлары, очерктері мен репортаждары ауданы, облысы газеттерде жарық көрген. «Жан шуағы» (2006) жинақ кітабының авторы.
Шарай Батырбайқызы атындағы биылғы сыйлықты табыстау рәсімі баласы Марат Сүйеуовтың отбасына берілді. Арнаулы сыйлыққа Ақтау қаласындағы №13 мектеп-гимназиясының 4 сынып оқушысы Ару Бақытжан ие болды. Дарынды оқушы «Маңыстау облысынан шыққан қыздар арасындағы алғашқы журналист Шарай Батырбайқызы» мақаласымен «Зерде» ғылыми жобалар сайысының қалалық, облыстық кезеңдерінде жеңімпаз болып, 1 орын алған.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
