Маңғыстау ауданына қарасты Сайөтес ауылында Республика күні қарсаңында жаңа мәдениет үйі ашылды, деп хабарлайды mangystaumedia.kz аудан әкімдігінің баспасөз қызметіне сілтеме жасап.
«Ауыл – ел бесігі» бағдарламасы аясында салынған жаңа ғимаратта 200 орындық концерт залы және үйірмелерге арналған бірнеше зал бар. Атап айтқанда, әдіскерлерге арналған бөлме мен ансамбль, хор, вокал, гример, костюмер, би, домбыра, қолөнер үйірмелері және жарық-дыбыс студияларымен жабдықталған.
Сонымен қатар, ғимаратта ауыл кітапханасы да орналасқан.
Ашылу салтанатында игі істердің бірқатарын айтып өткен аудан әкімі Ғалымжан Ниязов тұрғындарды ұлттық мерекемен құттықтады.
- Құрметті тұрғындар, ұлттық мереке қарсаңында жағымды жаңалыққа қатысты үлкен жиында кездесіп отырмыз. Бүгін Сайөтес ауылында мәдениет үйі қолданысқа берілді. Енді жаңа нысанда балаларды өнерге баулуға, олардың шығармашылығын шыңдауға мүмкіндік туды. Жаңа мәдениет үйі ел игілігіне қызмет етуіне тілектеспіз. Ауданымызда «Маңғыстау ауданының серпіні», «Ауыл - ел бесігі» жобалары аясында нәтижелі жұмыстар атқарылып келеді. Республика күні құтты болсын. Ынтымақты ұран, татулықты ту еткен елдің бағындырар белесі биік болмақ. Сондықтан еліміз аман, жастарымыз жігерлі, балаларымыз білімді, татулығымыз мәңгі болсын, - деді аудан әкімі Ғалымжан Ниязов.
Жаңадан ашылған нысанның құны 691,0 млн. теңгені құрайды. Құрылысты «АС Құрылыс ЖШС жүргізді.
Айта кетейік, Сайөтес ауылдық клубы 1965 жылы теміржол ғимаратынан қызыл бұрыш ашылып, кинозал жұмыс жасады. 1983 жылы штат беріліп, аудандық мәдениет үйі жанынан ауылдық клуб болып өз жұмысын жалғастырып келген.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
