Биыл 9 айда қатты тұрмыстық қалдықтарды қайта өңдеу және кәдеге жарату үлесі 31 пайызға жетті. Бұл былтырғы деңгейден 3,7 пайыздық тармаққа жоғары, - деп хабарлайды mangystaumedia.kz сайты.
Десе де облыста үйілген қоқыс саны азаяр емес. Космомониторинг бұған дейін 108 қоқыс үйіндісін анықтап берген. Ал осы уақытқа дейін тек 67 қоқыс үйіндісі ғана жойылған.
Мамандардың айтуынша, өңірде заңдастырылған қатты тұрмыстық қалдықтар полигоны пайда болмайынша, қоқыс үйінділерін жою мүмкін болмай тұр. Ал қазір облыста 23 полигонның тек жетеуі ғана экологиялық және санитарлық талаптарға сәйкес келеді.
"Өз кезегінде облыстың кешенді дамуына сәйкес Боранқұл, Жыңғылды, Ақшұқыр, Сайын Шапағатов ауылдарында қатты тұрмыстық қалдықтар полигондарын, оның ішінде инвесторлар есебінен 700 млн теңгеге салу жоспарланып отыр", - деді ҚР Экология, геология және табиғи ресурстар министрлігінің өкілдері.
Айта кетейік, бүгін ҚР Экология, геология және табиғи ресурстар министрлігінің өкілдері мен табиғат жанашырлары Маңғыстау облысының тұрғындарымен кездесу өткізді. Кездесуде өңірдің экологиялық жағдайы талқыланды.