Мемлекет басшысының тапсырмасымен Каспий теңізін зерттейтін мемлекеттік ғылыми институт құру мәселесі пысықталуда. Сонымен қатар Қаракөл көлінің экологиялық жағдайын жақсарту мақсатында министрлік облыс әкімдігімен бірлесіп, Қаракөл көлінен Каспий теңізіне құяр жеріне қатысты техникалық-экономикалық негіздеме әзірлеу туралы шешім қабылдады, деп хабарлайды mangystaumedia.kz.
Министрлікке Каспий теңізі мен Қаракөл көлінің таяздануына байланысты шағымдар түсіп жатыр. Каспий теңізіне негізгі су ағыны Еділ (90%) және Жайық (2%) өзендері арқылы келеді.
Ресей тарапымен Жайық өзен бассейнінің экожүйесін сақтау және қалпына келтіру бойынша бірқатар құжатқа қол қойылды. Құжаттар шеңберінде каналдар мен суландыру жүйелерін реконструкциялау, ормандарды қалпына келтіру, рұқсат етілмеген қоқыс үйінділерін жою, жағалауды нығайту, түбін тереңдету, тазарту жұмыстары және басқа да іс-шаралар өткізіледі.
Экология, геология және табиғи ресурстар министрлігі өкілдерінің тұрғындармен кездесуінде су тапшылығы мәселесі де сөз болды. Маңғыстау облысында жазғы «шың» кезеңде су тапшылығы байқалатыны белгілі. Облыс «Астрахань – Маңғышлақ» магистральды су құбырынан қамтамасыз етіледі. Құбыр 87%-ға тозған. Осы мәселені шешу үшін «Самұрық-Қазына» ҰӘҚ» АҚ су құбырын екі кезеңде қайта құру және жаңғыртуды жоспарлап отыр. Бірінші кезең бойынша жұмыс 2023 жылы басталады.
Сонымен қатар 2023 жылы Ақшымырау және Қызан ауылдарын сумен қамтамасыз етуді жақсарту үшін Қазба-Ақшымырау-Қызан су құбырларын қайта жаңғырту жұмыстары басталады.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
