Нұрдәулет Қилыбай жұмыс сапарымен Ақшұқыр ауылына барды

Бүгін, 13 қыркүйекте, Маңғыстау облысының әкімі Нұрдәулет Қилыбай Түпқараған ауданына қарасты Ақшұқыр ауылына жұмыс сапарымен барып, бірқатар әлеуметтік нысандардың жұмысымен танысты, деп хабарлайды mangystaumedia.kz

Алдымен өңір басшысы М.Әбдіхалықов атындағы мектеп гимназияға барды. 1987 жылғы жобамен салынған 624 орындық мектепте бүгінде 962 оқушы білім алады. Қазір онда 300 орындық жапсарлас оқу корпусының құрылысы жүріп жатыр.

-2022 жылдың 22 маусымында «Еврострой-А» ЖШС құрылыс-монтаж жұмыстарын бастады. Үш қабатты ғимаратқа толықтай инженерлік желілер тартылған, құрылыс-монтаждау жұмыстарының 70%-ы аяқталып отыр, - деді бас инженер Қалижан Міркәрімов.

Аймақ басшысы жауаптыларға мектеп құрылысын аяқтау үшін жедел түрде қажетті шараларды қабылдауды тапсырды.

Сонымен қатар, өңір басшысы Ақшұқыр ауылдық Мәдениет үйінің бүгінгі жай-күйімен танысты. 30 адам жұмыс істейтін мәдениет үйі биыл 10 млн теңгеге материалдық техникалық базасын жаңартты. Мамандардың айтуынша, 280 орындық мәдениет үйінің іші, сыртына жөндеу жұмыстары қажет. Ол үшін 2025 жылға 62 млн теңгеге сметалық құжаттамалары жасақталып, ұсынылды. Аймақ басшысы қажетті қаражат бөліп, мәдениет ошағының жұмыстарын жүйелі үйлестіруді тапсырды.

Осыдан кейін Нұрдәулет Қилыбай Ақшұқыр ауылын аралап, тұрмыстық қалдықтарды шығарумен айналысатын коммуналдық мекеме басшысымен кездесті. Ауыл тұрғындарынан қоқыс мәселесіне қатысты жиі шағым түсетінін айтқан әкім, ауылды таза ұстау және қоқыс жәшіктерінің санын көбейту жөнінде нақты тапсырма берді.

- Ақшұқыр, Сайн-Шапағатов ауыл тұрғындарынан қоқыс шығарылмайды деген шағым көп түседі. Қажет болса қоқыс жәшіктерін көбейтіңдер, жұмыс күшін қосыңдар, бірақ мәселе шешілу керек. Жауапкершілікті алдыңдар ма, орындаңдар, - деді Нұрдәулет Қилыбай.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.