Маңғыстаулық полицейлер самбо күресінен үздік атанды

Маңғыстауда самбодан ҚР құқық қорғау, арнайы және күш-құрылымдарының қызметкерлері мен әскери қызметшілерінің қатысуымен өткен ІІМ және “Динамо” ДШСҚ ОК Х ведомствоаралық спартакиадасы қорытындыланды, - деп хабарлайды mangystaumedia.kz сайты.

Облыстық ПД бастығы полиция генерал-майоры Аян Дуйсембаев алғысөз сөйлеп, жеңімпаздарды құттықтады. Айта кетейік, Аян Сабитұлы - дзюдодан КСРО және қазақ күресінен Қазақ КСР спорт шебері.

Жарыста 31 команда, 217 спортшы бақ сынады. Оның ішінде 5 әлем чемпионы, 9 халықаралық дәрежедегі спорт шеберлері, 1 ҚР еңбек сіңірген, сондай-ақ 53 спорт шебері бар.

Департаменттер арасындағы жарыс қорытындысы бойынша өңір намысын қорғаған Маңғыстау облысы полиция департаментінің құрама командасы жүлделі 1-орынды қанжығаға байлады. Екінші орынға Астана қаласы командасы жайғасса, Алматы қаласынан келген спортшылар тобы 3-орынды еншіледі.

“Динамо” қоғамының ведомствоаралық спартакиадасының нәтижелеріне сәйкес, ІІМ командасы жеңімпаз атанды. Екінші орын “Динамо” спорт қоғамына бұйырса, 3-орынды ҚР Ұлттық ұлан командасы иеленді.

— Баршаңызды дүбірлі доданың сәтті аяқталуымен құттықтай отыра, жеңісті күндерде кездесуді тілеймін. Жарыс жоғары деңгейде өтті. Ең бастысы, барлық қатысушылар сайысты аман-есен қорытындылап, отбасыларына оралады, - деді Аян Дуйсембаев.

Жеңімпаздар мен жүлдегерлерге медаль, диплом және кубоктар табысталды, сондай-ақ сый-сыяпаттармен марапатталды. Төрешілер мен сайысты ұйымдастырушылардың жұмыстары да ерекше атап өтілді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.