Маңғыстаулық оқушылар халықаралық олимпиадан жүлделі қайтты

Қытайда өткен химия пәнінен 58-Халықаралық Менделеев олимпиадасында қазақстандық оқушылар тоғыз медаль жеңіп алды, - деп хабарлайды mangystaumedia.kz сайты.

Жеңімпаз атанғандардың арасында маңғыстаулық екі оқушы бар. Ақтау қаласы «Білім-Инновация» лицей-интернатынан Әділжан Молдағұл күміс жүлдеге, Әліби Мұғалім қола жүлдеге ие болды.

Оқу-ағарту министрлігінің мәлімдеуінше, жалпы олимпиадаға 29 елден 200-ден астам оқушы қатысып, өзара 15 алтын, 30 күміс және 45 қола жүлдені сарапқа салды.

Қазақстан құрама командасы 1 алтын, 2 күміс және 6 қола, барлығы 9 медаль жеңіп алды.

Алтын медальді Павлодар қаласындағы №8 дарынды балаларға арналған лицейдің оқушысы Ринат Илюсизов қанжығаға байлады.

Күміс медальге Ақтау қаласының «Білім-Инновация» лицей-интернатынан Әділжан Молдағұл және Астана қаласының физика-математика бағытындағы НЗМ-нен Кирилл Ким алды.

Қола медальге Астана қаласының физика-математика бағытындағы Назарбаев Зияткерлік мектебінен Абылай Қабдулхадыр, Haileybury Almaty халықаралық мектебінің оқушысы Алихан Серікұлы, Алматы қаласының химия-биология бағытындағы Назарбаев Зияткерлік мектебінен Еңлік Бақытбекова, Павлодар қаласының химия-биология бағытындағы Назарбаев Зияткерлік мектебінен Тамила Рахимбаева, Қарағанды қаласының №1 «Білім-Инновация» мектеп-интернатынан Санжар Қалиақбар және Ақтау қаласының «Білім-Инновация» мектеп-интернатының оқушысы Әліби Мұғалім ие болды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.