Маңғыстауда бір жылда отбасылық жанжал кезінде 6 аса ауыр қылмыс жасалған

Былтыр Маңғыстау облысында отбасылық зорлық-зомбылық кезінде аса ауыр дәрежеде 6 қылмыс болған. Яғни, адам өлтіру, адам ұрлау, бірнеше рет қайталанған сексуалдық сипаттағы зорлық-зомбылық баптары бойынша іс қозғалған, деп хабарлайды mangystaumedia.kz.

Бұл туралы «Отбасы тұрмыстық зорлық-зомбылық мәселесі» жөніндегі жиында Маңғыстау облысының полиция департаменті, жергілікті полиция қызметі басқарма бастығының орынбасары Бақытжан Берікбаев айтты.

Сондай-ақ ауыр дәрежедегі 2 қылмыс «Денсаулыққа қасақана ауыр зиян келтіру» бабы бойынша тергелген. 14 адам денсаулыққа қасақана орташа зиян келтiру бабы бойынша жауапқа тартылған.

- Әйелдерге зорлық-зомбылық көрсеткен 2792 ер адамға қайталап құқық бұзушылық жасамауы үшін қорғау нұсқамасы қойылды. Қорғау нұсқамасының талаптарын бұзған 84 адам ҚР ӘҚБтК-нің 461-бабы бойынша жауапкершілікке тартылды, - деді ол.

Отбасы-тұрмыстық қатынастар аясындағы құқыққа қарсы әрекеттер жасағаны үшін 1275 адам ҚР ӘҚБтК-нің 73-бабы бойынша әкімшілік шараға тартылып, 199 қолайсыз отбасы профилактикалық есепке қойылған.

Махаббат Нұржанқызы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.