Маңғыстау облысының экобелсенділері Ыбықты сайда сенбілік жұмыстарын жалғастырды

Елімізде ұйымдастырылып жатқан «Таза Қазақстан» экологиялық акциясы аясында Ыбықты сай аумағында сенбілік жұмыстары екі күнге жалғасты. Сенбілікке Маңғыстау туризм колледжінің студенттері мен облыстың экобелсенділері қатысты, деп хабарлайды mangystaumedia.kz.

Маңғыстау облысының ғажайып табиғатының бір көрінісі - Ыбықты сай. Бұл мекеннің Маңғыстау аумағындағы табиғат ескерткіштеріне ұқсамайтын ерекше келбетін тамсанбай айту мүмкін емес. Бұл жердің бір ғажабы – жаздың аптап ыстығы 30-40 градусқа жетсе де, сай іші жанға жайлы қоңыр салқын күйде тұрады.

Эколог және қоғам белсендісі Кирилл Осин маңғыстаулықтарды аймақтың көрікті жерлерін ұқыпты ұстауға шақырды. Оның айтуынша, көрікті жерлерге барып демалатын тұрғындар қоқыстарды өзімен бірге алып кеткені жөн.

«Бүгін біз таңғажайып көрікті мекен – Ыбықты сайындамыз. Бұл — табиғи бірегейлігі бар әсем шатқал. Өкінішке қарай Ыбықты сай ерекше қорғалатын табиғи аумаққа жатпайды, бірақ соған қарамастан шатқалдың таңғажайып сұлулығын таза ұстау, оны сақтау бойынша жұмыстарды жүргізу қажет. Ыбықты сайы туристер арасында өте танымал. Мұнда қыдырып келуші туристер мен қонақтар шатқалда едәуір қоқыс қалдырады екен. «Таза Қазақстан» республикалық акциясы аясында бүгін еріктілер, жас педагогтар, экология және туризм мамандықтары бойынша оқитын студенттер жиналды. Еріктілер осы шатқалды тазалауға өздері бастамашы болды. Бұл жай ғана осы аумақты қоқыстан тазарту ғана емес, сонымен қатар біздің өлкеміздің табиғатымен танысу шарасы болды. Мен мұнда алғаш рет келіп тұрмын, табиғаты ғажап екен», - деді Ақтау қалалық мәслихатының депутаты, «Эко-Маңғыстау» қоғамдық бірлестігінің төрағасы Кирилл Осин.

Маңғыстау туризм колледжінің оқытушысы Гүлнұр Кушанованың айтуынша, тазалық - табиғатқа деген махаббаттың басты көрінісі.

«Бүгін сенбілік аясында Ыбықты сай тарихи мекендеріне келіп, сенбілік жасап жатырмыз. Тарихи, әдемі жерімізді тазалап ұстап, сақтап қалуға мүмкіндік берген қоғамдық бірлестікке рақметімізді айтамыз. Жаспыз, жігерліміз, "елім маған не береді деп отырмай, мен еліме не беремін" деген ұранмен жүретін жастардың қатарынанбыз. Сондықтан көрнекті жерлерімізді келген қонақтарға таныстыру, тарихи жерлерді сақтап қалу мақсатында сенбілік жасауды жөн санаймыз. Замандастарыма демалуға келген кезде табиғатты бүлдірмей, тазалық сақтасақ нұр үстіне нұр болады деп айтқым келеді. Дәл қазір біз қандай әдемілікті көріп тұрмыз, сол әдемілікті ұрпақтан-ұрпаққа жеткізу - басты парызымыз, міндетіміз. Тазалықты сақтауға шақырамыз» деді оқытушы.

Сонымен қатыр, студенттер осы акция барысында облыстағы көрнекті орындармен де танысқанын айтты.

«Бүгін Маңғыстау туризм колледжінің студенттері «Таза Қазақстан» акциясы бойынша Ыбықты сайын тазалауға келдік. Мұнда сенбілік жасай жүріп, өңіріміздің тұмса табиғатын тамашалап жүрмін. Ыбықтының сайы өте ерекше орын екен. Мен бұл жерге бірінші рет келіп тұрмын. Сайдың ішінде от жағып, тамақ пісірген орын көп екен. Мұндай тарихи орынды ластап, бүлдіру дұрыс емес. Сондықтан баршаңызды туған өлкемізді таза ұстауға шақырамын», - деді студент Альбина Төлеген.
«Мұнда алғаш рет келдік, болашақта осы аумаққа саяхаттап келуді жоспарлап отырмыз. Өкінішке қарай, шатқалға саяхатшылар ойып жазып кеткен жазулар бар екен. Тұрғындарды табиғатты аялауға шақырамын», деді студент Даяна Дильшод.

Сонымен қатар, жастармен бірге сенбілікке шыққан апамыздың ісі көпке үлгі. Зейнеткер Күлән Сүйінованың айтуынша, оның эко белсенді болып жүргеніне 4-5 жылдай болған.

«Осыған дейін «Эко-Маңғыстау» ұйымымен бірлесіп Ынтымақ алаңына ағаш отырғызып, қоқыстан тазарттық, Оймақ өзенін тазаладық. Бүгін туристердің жиі келетін орны Ыбықты сайға да ұжыммен бірге келдім. Халықтан тазалықты сақтауын, қоқысын қалдырмай, жинауын сұраймыз. Бұл табиғатты сақтаудың бірден-бір жолы», - деді ол.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.