Маңғыстау облысының әкімі өңірдегі агроөнеркәсіп саласын дамыту бойынша нақты тапсырмалар берді

Бүгін, 2 шілде күні облыс әкімі Нұрдәулет Қилыбайдың төрағалығымен өткен аппараттық жиында жергілікті шаруаларды қолдау және ауыл шаруашылығы өнімдерінің көлемін көбейту мәселелері талқыланды, - деп хабарлайды mangystaumedia.kz сайты облыс әкімінің баспасөз қызметіне сілтеме жасап.

Өңір басшысы жергілікті өнім өндірушілерді қолдау жұмыстарына салғырт қараған жауапты тұлғаларды сынға алып, қала және аудан әкімдеріне тиісті тапсырмалар берді.

-Маңғыстаудың экономикалық өсуіне және халықтың әлеуметтік жағдайын жақсартуға маңызды үлес қосатын сала - туризм мен ауыл шаруашылығы. Болашағымыз осы салаларға тікелей байланысты. Өңірімізде өз қаражатына үлкен көлемде ауыл шаруашылығы өнімдерін өндіріп отырған азаматтар бар. Бірақ өнімдерін сатайын десе, жер ала алмай жүр, т.б. кедергілерге тап болуда. Мәселені тез арада шешіп, шаруаларға жағдай жасап беріңіздер, халық көп ұзамай жергілікті өнімді тұтынуы тиіс, – деді Нұрдәулет Қилыбай.

Сонымен қатар облыс әкімі түйе шаруашылығын дамытудың маңызды екенін атап өтті.

- Маңғыстау облысы - елімізде түйе басы ең көп өңір. Ежелден ата-бабамыздан мұра болып қалған, ұлттық кәсібіміз - мал бағу бүгінге дейін жалғасын тауып келеді. Жақында ғана Қытайдың Үрімші қаласында өткен «Қазақстан - Қытай» III аймақаралық форумында облыстан құрғақ түйе сүтін өндіретін зауыт салу бойынша келіссөз жүргізілді. Қазақстан, Қытай кәсіпкерлері бірлесіп, бұл жобаны жүзеге асыруға қызығушылық танытып отыр. Алдағы уақытта олар өңірге келіп, жан жақты зерттеу жұмыстарын жүргізеді. Сондықтан түйе шаруашылығын дамыту өте маңызды, – деді облыс әкімі.

Айта кетейік, облыста статистикалық мәліметтерге сүйенсек, 2024 жылдың қаңтар-маусым айлары жағдайында жалпы мал басы 807 849-ды құрады. Оның ішінде түйе саны 102 702 басты құрап, 2023 жылмен салыстырғанда 0,7% өсті. 2024 жылға мал шаруашылығын дамыту мақсатында 1,2 млрд теңге, өсімдік шаруашылығына 69,7 млн теңге, инвестициялық субсидиялауға 832,2 млн теңге және сыйақы мөлшерлемесіне 755,5 млн теңге қаражат көзделген.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.