Маңғыстау облысы республикада туу көрсеткіші бойынша көш бастады

2022 жылдың 12 айында Қазақстанда 403,9 мың бала дүниеге келді, оның 51,5% – ұл, 48,% – қыз бала, деп хабарлайды mangystaumedia.kz.

Дүниеге келген балалардың 241,4 мыңы қалада, ал 162,4 мыңы ауылды жерлерде дүниеге келген. 2022 жылы туудың жалпы коэффициенті 1000 адамға 20,57 құрады, 2021 жылы ол көрсеткіш 1000 адамға шаққанда 23,50 туылған нәресте деңгейінде болды.

Ең жоғары туу көрсеткіші Маңғыстау (1000 тұрғынға шаққанда 28,53 адам), Түркістан (27,67) облыстарында және Шымкент қаласында (27,13) тіркелді. Ең төмен туу көрсеткіші Солтүстік Қазақстан (1000 тұрғынға 10,96), Қостанай (12,42) және Шығыс Қазақстан облыстарында (12,96) байқалды.

2022 жылы әйелдердің бала туу кезіндегі орташа жасы алдыңғы жылдармен салыстырғанда 31,5 жасқа дейін ұлғайған (2021 – 29,5 жас, 2020 – 29,3 жас), қалалық жерде – 31,9 жас (2021 – 29,9 жас), ал ауылдық жерлерде – 31 жасты (2021 – 29,1 жас) құрады.

Қазақстанның басым өңірінде бала туу кезіндегі әйелдердің орта жасы республикалық деңгейден жоғары болды.

Республикалық маңызы бар қалалардағы бала туу кезіндегі әйелдердің ең жоғары орта жасы Астана – 32,5 жас, Алматы – 32,3 жас, ең төменгі орта жасы Түркістан облысында – 30,2 жас болды. Бұл ретте алғаш босанғандардың орташа жасы 26,8 жасты құрады.

Туудың жиынтық коэффициенті (ТЖК) – репродуктивтік кезең бойы (15-49 жас) орта есеппен бір әйелден туған балалардың саны – 2022 жылы республика бойынша – 3,05 (2021ж. – 3,32), қалалық жерде – 2,76 (2021ж. – 3,08), ауылдық жерлерде – 3,59 (2021ж. - 3,75) жетті.

Ел өңірлерінің ішінде ТЖК ең жоғары деңгейі Түркістан (4,52), Маңғыстау (4,15) облыстарында, ал ең төмені Қостанай (1,97) және Солтүстік Қазақстан (1,87) облыстарында тіркелді.

Дүниеге келген балалардың төрттен бір бөлігі дерлік тұңғыш бала – 100 мың, 94,4 мыңы – отбасында екінші болып туған, сегізінші боп туған бала саны – 1 мың балаға жетті.

Сондай-ақ, өткен жылы 4063 (2021ж. – 4216) егіз және 50 (2021г. – 43) үшем дүниеге келген.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.