Елімізде әйелдердің 17 пайызы зорлық-зомбылық көрген

Маңғыстау облыстық перинатальдық орталығында «Гендерлік​ зорлық-зомбылық​ жағдайындағы Қазақстанның​ денсаулық сақтау жүйесінің іс-әрекеті» тақырыбында тәжірибелік конференция өтті, деп хабарлайды mangystaumedia.kz облыстық денсаулық сақтау басқармасына сілтеме жасап.

Аталған шара облыстағы медицина ұйымдарының гинеколог дәрігерлерін, кәсіби заңгерлер, психолог мамандар мен қоғам белсенділерін, зорлық-зомбылықтың алдын алуда және оған жауап беруде маңызды рөл атқаратын құқық қорғау қызметкерлерін біріктірді.

Айта кететіні, 2020 жылы ҚР Денсаулық сақтау министрлігі ЮНФПА-ның қолдауымен гендерлік зорлық-зомбылық кезінде медициналық көмек көрсетудің отандық практикадағы ​ алғашқы Клиникалық Хаттамасын қабылдаған болатын. Өйткені, зорлық-зомбылыққа ұшыраған жандармен бірінші болып қарым қатынас орнататын - медицина ​ қызметкерлері. Сондықтан, денсаулық сақтау жүйесі зорлық-зомбылықты басынан өткерген адамдарды анықтауда және оларға қолдау көрсетуде негізгі тетік болып табылады. ​ Конференцияда балалық шақтың қауіпсіздігін қамтамасыз ету, гендерлік теңдік, бақытты отбасы моделін қалыптастыру, демографиялық даму перспективалары, тұрмыстық зорлық-зомбылыққа қарсы іс-қимыл мәселелері талқыланды.

Әлемдегі әрбір үшінші әйел​ негізінен жыныстық серіктес тарапынан физикалық немесе жыныстық зорлық-зомбылыққа ұшырайды. Қазақстанда серіктестері бар 18-75 жас аралығындағы​ әйелдердің 17%-ы​ өз өмірінде бірнеше рет физикалық немесе жыныстық зорлық-зомбылыққа, тіпті екеуін де бастан кешірген.

Балалар гинеколог мамандары гендерлік зорлық-зомбылықтан зардап шеккен жасөсперімдерге медициналық көмек көрсетудегі білімдерімен және тәжірибелерімен өзара бөлісті. Конференция шеңберінде арнайы дайындалған буклеттер қатысушыларға таратылды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.