Ақтаудағы мектептердің бірінде ерекше қайырымдылық акциясы өтті

Қайырымдылық ациясының мәні – алғашқы қыркүйекте сыйланып, кейін қурап қалатын гүлдердің орнына мұқтаж жандарға көмек көрсету. Бұл ізгі іс-шараға Ақтауда орналасқан "Өркен" мектебінің 1 «Б» сынып ата-аналары қатысты, деп хабарлайды mangystaumedia.kz сайты.

- Әр оқу жылы басталарда балалар мұғалімдерге гүл шоқтарын сыйлайды. Иә, бұл әдемі дәстүр. Бірақ бір-екі күннен кейін бұл гүл шоқтары қурап, қоқысқа айналады. Егер гүл сыйлау тек бір сыныпта болса – мейлі. Дегенмен, елестетіп көріңізші, қоқыстағы қураған гүл – мектеп, қала және ел ауқымында орын алады! Сондықтан біз гүл сыйлаудың орнына жақсылық жасап, мұқтаж жандарға көмек көрсетуді дұрыс көрдік,- деді ата-аналардың бірі.

«Добряков Клубы» ерікті ата-аналарға Басқұдық ауылындағы жалғызбасты анаға көмектесуді ұсынған. Балаларының бірін мектепке жинауға әйелдің мүлдем ақшасы болмады. Осы тұста 1 «Б» сынып оқушыларының ата-аналары ұсынған көмек бұл отбасыға пайдасын тигізді.

- Менің өтінішіме жауап беріп, көмектескендеріңізге ризамын! Балам мектепке қажет құралдардың барлығы алынғанына қуанышты. Бұл іс – өте жақсы бастама,- деді жалғызбасты ана.

Айта кетейік, акцияға қатысу ерікті түрде өтті, көмек көрсету үшін белгіленген арнайы сома жоқ.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.