Ақтауда жылжымалы павильоны бар аялдамалар орнатуға қатысушыларды іріктеу конкурсына өтінімдер қабылдау басталды, деп хабарлайды mangystaumedia.kz сайты қала әкімдігінің баспасөз қызметіне сілтеме жасап.
Байқау Маңғыстау облысын дамытудың 2021-2025 жылдарға арналған бағдарламасына сәйкес өткізілуде. Бағдарлама ішінде 33 аялдама салуға конкурс бар. Негізгі шарттардың бірі – әлеуметтік аялдаманы орнату және Ақтау қаласы әкімдігінің балансына өтеусіз беру. Әлеуметтік аялдама кәсіпкердің қаражатына салынады.
Кәсіпкер конкурста жеңіп шыққан жағдайда жалға берушімен шарт жасасқаннан кейін алты айдан кешіктірмей аялдама салуға, бір жылдан кешіктірмей бекітілген эскизге сәйкес коммерциялық павильонмен аялдама салуға міндетті. Конкурс тек қала әкімдігі белгілейтін аялдамалар үшін өткізіледі.
Бір мекен-жайға бірнеше өтініш түскен жағдайда, жеңімпаз ұпайлық әдіспен анықталады. Бекітілген эскизге сәйкес қосымша әлеуметтік аялдама болған жағдайда – 5 балл. Ал ойын алаңын салғанда – 8 ұпай, 30 тал отырғызғанда – 1 ұпай.
Ақтау қаласы әкімдігімен жасалған бірыңғай схемаға қандай да бір өзгерістер енгізуге, сатуға немесе жалға беруге, жер телімін кеңейтуге және конфигурациясын өзгертуге қатаң тыйым салынады.
Өтініште кәсіпкердің барлық шарттарымен келісімін растайтын нотариалды куәландырылған кепілдік хат болуы керек.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
