Ақтауда заңсыз салынып жатқан тұрғын үй кешені сүрілді

Тексеру нәтижесі көрсеткендей, №9 өндірістік аймақтың 35 шағын аумағында салынып жатқан тұрғын үй кешенінің қажетті рұқсат қағаздары болмаған. Жобалық-сметалық құжаттары бекітілмеген, ал бұл «ҚР сәулет, қала құрылысы және құрылыс қызметі туралы» заңға қайшы келіп отыр, деп хабарлайды mangystaumedia.kz сайты.

Сәулет-құрылысын мемлекеттік бақылау басқармасы бұл ғимаратты заңсыз деп тануы үшін сотқа жүгінген.

Құрылыс салушы ЖК “Камаловқа” құрылыс-монтаждау жұмыстарын тоқтата тұру туралы ұйғарым шығарылып, ҚР ӘҚБтК-нің 316, 321, 463-баптарына сәйкес әкімшілік жауапкершілікке тартылды.

– Ақтауда қажетті рұқсат құжаттарынсыз заңсыз салынған нысандармен белсенді күрес жүргізілуде. Қазірдің өзінде заңсыз құрылысты тоқтату мақсатында сотқа көптеген талап-арыздар жолданған. Үйлерді бұзу шаралары да қолданыстағы заңнамаға сәйкес жүргізіледі», - деді Маңғыстау облысы бойынша мемлекеттік сәулет-құрылыс бақылау басқармасының басшысы Дәурен Өтепқали.

Басқарманың хабарлауынша, мемлекеттік мекеме Маңғыстау облысының мамандандырылған ауданаралық экономикалық сотымен біірлесіп бірқатар заңсыз ғимараттарды бұзу мақсатында сот ісін бастаған.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.