Бүгін Yessenov университетінде Қазақстан-Әзірбайжан жастары форумы басталды. Форумға Әзірбайжан елінен арнайы келген жастар ұйымдарының көшбасшылары, өнер, спорт, мәдениет, туризм және БАҚ саласының белсенді өкілдері, құрметті қонақтар атсалысты, деп хабарлайды mangystaumedia.kz
Танымдық-мазмұндық ауқымы аса зор іс-шара екі елдің бірлігін бекемдеуге, нақтыласақ жас буын өкілдерінің жаңа дәуірдегі сын-қатерлерге қарсы тұруда бірлесе әрекет етуіне бағытталған. Форум үш тілде, әзірбайжан, қазақ және орыс тілдерінде өтті.
- Біздің елімізде Қазақстан мен Әзірбайжан елдері жастарының ынтымақтастық форумы тұңғыш рет өтіп жатыр. Біз Каспий маңы елдері ғана емес, түбі бір туысқан түркі халқы ретінде де салт-дәстүр, әдет-ғұрыптарымыз, әлеумет, экономика мен мәдени салалардағы серіктестікігімізбен ежелден бауырлас елдерміз. Жыл өткен сайын өзара ынтымақтастық тіні бекіп келеді. Қазақстан аумағында Әзірбайжан Республикасының 800-ден астам түрлі кәсіпорыны жұмысын сәтті жалғап келеді және біздің Маңғыстауда 250-ге жуық әзірбайжандық бизнес өкілдері қазақстандық компаниялармен серіктестік орнатқан. Бұл көрсеткіштер өзара қарым-қатынас құруда маңызды рөл атқарады. Біздің студенттер үшін өндірістік тәжірибеден өту, одан әрі жұмысқа орналасу үшін мүмкіндіктер жасалды. Жастарымыз өздерінен артылған үміттерді толығымен ақтайтынына сенімдімін, - деді Yessenov университетінің зерттеу және дамыту жөніндегі вице-президенті Асқар Сейдалиев.
Форум барысында атап өтілгендей, келесі жылы осындай көлемдегі іс-шара Бакуде өтеді.
- Біз үшін өте қызықты, үлкен мотивация болды. Форумның ауқымы таң қалдырды. Дарынды, жігерлі жандардың бір ортада шоғырлануы қуат дарытады. Бұл көптеген жаңа нәрселерді білуге, өз дағдыларыңызды дамытуға және жалпы осындай қызықты адамдармен танысуға үлкен мүмкіндік, өйткені форум жас буынның қызығушылығына бағытталған, - деп өз әсерімен бөлісті студенттер.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
