Ақтауда ерікті студенттер 3 тәуліктен бері құлсарылықтарға көмек көрсетіп жатыр

Көршілес өңірдегі су тасқынына байланысты облысымызға көшірілгендерге «Ш.Есенов атындағы Каспий технологиялар және инжиниринг» университетінің жатақханасынан орын беріліп жатыр. Бұл жатақханаға қазір 175 адам орналасқан, - деп хабарлайды mangystaumedia.kz.

Университет еріктілері бұл жатақханаға көшірілген тұрғындарға 3 күннен бері көмек көрсетіп жатыр.

- Бұдан бөлек қала волонтерлары киіз үй тігіп, келген балаларға ойын алаңын жасап, тамақ жағынан қамтамасыз етуге көмектесіп жатыр. Қаладағы мейрамханалар мен кафе иелері қолдау білдіріп жатыр, - деді Есенов университетінің қызметкері Әлібек Асқарұлы.

Бүгін осы жатақханаға қаламыздағы «Tongal-house» кафесінің иелері өз еркімен қолдау білдіріп, киіз үй тігіп берген. Бұл киіз үйде эвакуацияланған тұрғындарға үш мезгіл ас беріліп жатыр.

- Кеше 29 шағынаудан жігіттерінің бастамасымен алғашқы киіз үйімізді тіктік. Жатақханаға қоныстанған 175 адамның 78-і балалар. Қазір Ақтауға келіп босанған әйел адамның бөлмесін дайындап, күтіп отырмыз. Қалған бөлмелерге қолдан келгенше адамдарды орналастырамыз деп отырмыз. Келуші әйел адамдар «ішіміз пысады, өзіміз тамақ пісіреміз» деген соң, қазан-ошақтарын әкеліп бердік. Интернет желісін де орналастырып жатырмыз, - дейді «Біз спорт үшін есірткіге қарсымыз» қоғамдық қорының жетекшісі Роман Ескендірұлы.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.