Ақтауда екпеден соң ауырып қалған оқушылардың жағдайы белгілі болды

Екпеден кейін жайсыз сезінген екі оқушы облыстық балалар ауруханасына жеткізілген. Науқасқа облыстық балалар ауруханасының қабылдау бөлімінде алғашқы медициналық көмек көрсетіліп, толық тексеру жүргізілді. Жағдай психоэмоционалды күйзелістен туындаған, - деп хабарлайды mangystaumedia.kz сайты.

Маңғыстау облыстық денсаулық сақтау басқармасы баспасөз қызметінің мәліметінше, науқастардың жағдайы жақсаруына байланысты ата-анасы ауруханаға жатқызудан бас тартты. Маңғыстау облыстық көпбейінді балалар ауруханасының педиатры пациенттерді тұрғылықты жері бойынша емханаға амбулаторлық бақылауға жіберді.

- Балаларға жоспар бойынша екпе егілді. Вакцинадан кейін балалар педиатрдың бақылауында болды. Қазіргі таңда мектеп оқушыларының жағдайы қанағаттанарлық. Вакцинаға реакция тіркелмеген. Педиатрлар мен мектеп медбикесі ата-аналармен байланысқа шықты. Медицина қызметкерлеріне ешқандай шағым жоқ, - деді облыстық денсаулық сақтау басқармасының баспасөз қызметі.

Еске салайық, А гепатитіне қарсы вакцинадан соң IT-лицейдің екі оқушысы ауырып қалған еді. Оқиға 23 ақпанда болған.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.