Маңғыстаулық мергендер республикалық турнирде топ жарды

Маңғыстаулық мергендер республикалық турнирде топ жарды, деп хабарлайды mangystaumedia.kz Қоғамдық коммуникация орталығына сілтеме жасап.

Қостанай қаласында «Қостанай-мергені» атты жасөспірімдер арасында «Дәстүрлі садақ атудан» Республикалық турнир өтті.

Сайыста 18 жасқа дейінгі балалар ату қашықтығы мен нысана түрлеріне байланысты санаттарға бөлініп, бақ сынасты.

Жарысқа Қазақстанның барлық аймағынан 150-ге жуық спортшы қатысты.

Байқау 10,15,20,50 метр қашықтықтан және нысанаға атудың екі түрлі қырғыз және қазақ стилі бойынша өткен.

Жарыс нәтижесінде Маңғыстаулық жасөспірім спортшылар командалық есепте 1-орын алып, топ жарды. Екінші орынға Атырау облысы, ал үшінші орынға Алматы облысы орналасты.
Маңғыстаулық мергендер 5 алтын, 3 күміс, 4 қола жүлде иеленген. Атап айтқанда ұлдар арасында қоланы «олимп нысанасы» бойынша 10 метр қашықтықта Човбай Абдулазиз мен 20 метр қашықтықта Айдар Әділгерей иеленді. Ал, 15 метр қашықтықта Бейбарыс Бақытбай күміс жүлдегер атанса, 10 метр қашықтықта Исмайл Шакір мен 20 метр қашықтықта Айбек Ораз алтын жүлдегер атанды. Ал, қыздар арасында Асия Шакир 10 шақырым қашықтықта олимп нысанасына көздеп қола жүлдені иеленсе, Мадина Мурадова 25 метр қашықтықта күміс жүлдегер атанды.

МО жамбы атудан аға жаттықтырушысы Сәнім Мурадованың айтуынша, мергендердің ептілік қабілетін ерекше көрсететін категориялардың ішінде күрделісі «Жамбы нысанасына» ату. Осы категорияда да маңғыстаулық мергендер үздік нәтиже көрсетті. Атап айтқанда, Исмайл Шакир, Мадина Мурадова, Асия Шакир жамбы атудан алтын жүлдегер атанды. Сонымен қатар, жамбы нысанасы бойынша Ахмеджан Адия күміс жүлдегер, Бөлекбай Шектібай қола жүлдегер атанды.

Солтүстік өңірде мергендер сайысы 18-20 тамыз аралығында өтті.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.