Ақтауда пошта сәлемдемелеріне тінту жүргізілді

Қазақстан Республикасы Ішкі істер Министрлігінің операциялық жоспарына сәйкес Республика көлемінде, соның ішінде Маңғыстау облысы бойынша 1 маусым мен 31 қазан аралығында «Қарасора-2022» жедел- профилактикалық іс-шарасы өтуде, деп хабарлайды mangystaumedia.kz Маңғыстау облысы Полиция департаментінің баспасөз қызметіне сілтеме жасап.

Маңғыстау облысы полиция департаментінің Есірткі қылмысына қарсы іс-қимыл басқармасының қызметкерлері есірткі қылмысына тосқауыл қою мақсатында жүйелі жұмыстар атқаруда.

«Қарасора-2022» жедел-профилактикалық іс-шарасы аясында ПД Кинологиялық қызмет орталығының иттері көмегімен Маңғыстау облысы «Казпочта» АҚ басқармасына келген-кеткен почталардан есірткі тасымалын анықтау мақсатында, ұяшықтарды тінту жұмыстары жүргізу арқылы профилактикалық шара ұйымдастырылды.

Аталған іс-шараның мақсаты – салауатты өмір салтын насихаттау, нашақорлыққа қарсы күрес шараларын күшейту, есірткі құралдарының, психотроптық заттардың және олардың аналогтарының, сондай-ақ, тыйым салынған заттардың заңсыз айналымын анықтау, оның жолдарын кесу, сонымен қатар онымен айналысатын ұйымдасқан қылмыстық топтарды анықтау.

Тексеру барысында ешқандай құқық бұзушылық анықталған жоқ. Мұндай іс-шаралар әлі де жалғасын табатын болады. Осыған орай, Маңғыстау облысы Полиция Департаменті азаматтарды бей-жай қалмауға және нашақорлыққа қарсы күресте белсенді көмектесуге, қоғамдық дертпен бірге күресуге шақырады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.