Маңғыстау облысында жыл басынан бері кәсіпорындармен құны 706,2 млн.долларға 1.2 млн.тонна өнім экспортқа шығарылды. Бұл туралы облыстық Қоғамдық коммуникация орталығында өткен брифингте Маңғыстау облысы индустриалдық-инновациялық даму басқармасының басшысы Венера Мұстапаева айтты, - деп хабарлайды mangystaumedia.kz сайты.
Оның айтуынша, көрсеткіш 2021 жылмен салыстырғанда 68% өскен.
- Сыртқа шығарылған тауарлардың басым бөлігі - мұнай және мұнай өнімдері. Яғни, мұнай өнімі - 96,97%, қалғаны шикізаттық емес тауарлар. Ал келесі жылы сыртқы сауда айналымын 4,3 млрд.долларға жеткізу жоспарланды. Импортқа келетін болсақ, 68,1 мың долларға тауар әкелді. Көрсеткіш 2021 жылмен салыстырғанда 37,7%ке артқан,- деді Венера Мұстапаева.
Сондай-ақ биыл 120 млрд.теңге 21 инвестициялық жобаны іске асыру көзделген. Осылайша, 1 мыңнан аса жұмыс орны құрылады деп күтілуде.
- Ең маңызды жобаларға тоқталсам, насос штанг шығаратын «EVEREST TECHNO» ЖШС 3-тоқсанда қосылады. Жоба құны - 14,2 млрд. тг., 200 жаңа жұмыс орны құрылады. Сондай-ақ күніне 10 000м3 су шығаратын «Aktau water solutions» ЖШС жобасы. Құны - 3 млрд. тг. 24 жаңа жұмыс орны құрылады,-деді Венера Мұстапаева.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
