Маңғыстау облысында жеке тұрғын үй құрылысына жер телімдерін алуға 205400 адам кезекте тұр, деп хабарлайды mangystaumedia.kz облыстық ҚКО-ға сілтеме жасап.
Бұл туралы Қоғамдық коммуникациялар орталығында өткен брифингте өңірдің жер қатынастары басқармасының басшысы Есемұрат Дүзмағанбетов айтты.
Оның айтуынша, тұрғандардың саны жылдан жылға артып келеді. 2020 жылы кезекте 172 мың 933 адам болған.
- Жер учаскелеріне кезектің ұлғаюы EGov порталы арқылы кезекті тіркеу процесін автоматтандыруға, кезекте тұрғандар тізімін электрондық форматқа беруге байланысты. Бұл бұрын мемлекеттен жеке тұрғын үй құрылысы үшін жер учаскесін алмаған азаматтарға әкімдікке бармай-ақ, EGov порталы арқылы өтініш беруге және еліміздің кез келген елді мекенінде жерге кезекке тұруға мүмкіндік береді, - деп хабарлады Есемұрат Дүзмағанбетов.
Ол Ақтау және Жаңаөзен қалаларында жеке тұрғын үй құрылысы үшін жер берілмейтінін атап өтті. Басқа аудандар бойынша 21 156 бос учаске бар. Оның ішінде электр желісімен, ішінара газбен және сумен толық қамтамасыз етілген 2055 учаске (7,8%) инфрақұрылыммен қамтылған.
- Өткен жылы кейбір жер иеліктеріне өзгерістер енгізілді. Қазіргі уақытта, ҚР Жер кодексінің 33-бабының 5-1) тармақшасына сәйкес, жалға берілген ауыл шаруашылығы мақсатындағы жер учаскелеріне жер пайдалану құқығын сатып алмай, сатып алу-сату, сыйға тарту мәмілелерін және басқа да мәмілелерді басқа тұлғаға жасау мүмкіндігі пайда болды. Сонымен бірге, егер осы Кодексте өзгеше белгіленбесе, ауыл шаруашылығы мақсатындағы жерлерде жер пайдалану құқығын иеліктен шығару азаматтық-құқықтық мәмілелер негізінде жер пайдалану құқығын берген кезден бастап жалдау мерзімінің бес жылы өткеннен кейін жүзеге асырылады, - деп түсіндірді Есемұрат Дүзмағанбетов.
Оның айтуынша, аталған жағдайларда жер пайдалану құқығын алған жер пайдаланушы Ауыл шаруашылығы мақсатындағы жер учаскелерін уақытша өтеулі жер пайдалану (жалға алу) шарты бойынша жалға берушінің алдында жауапты болады.
Сонымен қатар, қазіргі уақытта ауыл шаруашылығы жерлерін уақытша пайдалану құқығын алу мүмкіндігі бар.
Маман Жер кодексінің 24-бабына сәйкес шетелдіктерге, азаматтығы жоқ адамдарға, шетелдік заңды тұлғаларға, шетелдік қатысуы бар ҚР заңды тұлғаларына, сондай-ақ Халықаралық ұйымдарға ауыл шаруашылығы мақсатындағы жер учаскелері жеке меншікке де, жер пайдалану құқығымен де берілмейтінін қосты.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
