«Қаражанбасмұнай» АҚ мұнайшылары Ақтауды көгалдандыруда

«Бірге - таза Қазақстан» жалпыреспубликалық экоакциясы аясында «Қаражанбасмұнай» АҚ (әрі қарай – ҚБМ) әлеуметтік жауапты компания ретінде игі дәстүрге айналған өңір аумағын абаттандыру және көгалдандыру жұмыстарын жалғастыруда. Бүгін ҚБМ Бас директоры Ли Тецян және бірінші орынбасар Қуанышбай Нұрғалиев бастаған барлық департамент басшылары мен орталық кеңсе қызметкерлері ауқымды сенбілікке шықты.

Қала әкімдігі қаражанбастықтардың бастамасын қолдап, екі аумақ бөліп берді. Бұл 12 шағын аудандағы Тобанияз ескерткіші жанындағы саябақ, және Т.Шевченко ескерткіші маңы. Мұнайшылар білегін сыбанып, қолына күрек алып, аумақты қоқыс пен арамшөптерден тазартып, кейін көшеттер отырғыза бастады. Қаражанбастықтар айлант, үйеңкі, шаған сияқты 200-ден астам жапырақты ағаштар тобына жататын көшеттер отырғызды. Осылайша, қаланың ең көрнекті жерлері көркіне көрік қоса түсті.

«Әдетте, біз тек ағаш отырғызып қана қоймай, үнемі күтім жасап, суару жауапкершілігін де өз мойнымызға аламыз. Мысалы, өткен жылы кен орны мен облыстың бірқатар әлеуметтік нысандары аумағына отырғызылған 3000 көшет сәтті тамыр алып, гүлдеді. Сондықтан сенбілік-бұл қаланы абаттандыру және көгалдандыру жұмыстарының аз ғана бөлігі», - деп атап өтті ҚБМ жұмысшылары.

Мұнайшылардың жыл сайынғы іс-шаралары нәтижесінде облыс орталығының көптеген нысандары жасыл желекке орана түсті. Болашақта осындай игі дәстүрді жалғастыру жоспарланып отыр. Қаражанбастықтар бүгінгі шара бүкіл Маңғыстау бойынша осындай экоакцияларға ұласады деп үміттенеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.