Теңіз жаяу әскерінің сарбаздары үйіне оралды

Ақтау гарнизонының теңіз жаяу әскерлері бригадасында запасқа шығарылған мерзімді қызметтегі 600-ге жуық сарбаз үйіне оралды. Олар бөлімнің әскери ар-намыс, ерлік пен даңқ символы саналатын Жауынгерлік тумен қоштасты, - деп хабарлайды mangystaumedia.kz сайты.

Бір жылдың ішінде сарбаздар дене бітімі шынығып, моральдық тұрғыда өсті, әскери мамандықтарды меңгерді. Олар «Отпантау-2021» оқу-жаттығуы кезінде жауынгерлік машығын жоғары деңгейде көрсетіп, «Мергендер батальоны» және «Үздік взвод» конкурстарында үздік шықты.

– Ел қорғаны болған сарбаздарымызды әрдайым мақтан етеміз. Сендер Отанын сүйген нағыз ер жігіт өтетін жолдан өттіңдер. Өздеріңнің жақсы қасиеттеріңді көрсетіп, жауынгерлік және мемлекеттік-құқықтық даярлықта жақсы нәтижелерге қол жеткіздіңдер, – деді бригада командирі подполковник Жаннұр Сатқынов.

Қызметтік міндеттерін адал атқарғаны және үлгілі әскери тәртібі үшін бірқатар сарбаздар грамоталармен, әскери қызметі туралы фотоальбомдармен және естелік сыйлықтармен олардың ата-аналары алғыс хаттармен марапатталды.

Қарулы күштерде биыл көктемде мерзімді қызметтің 6000-ға жуық әскери қызметшісі запасқа шығарылған болатын.

Мемлекет басшысы Қасым-Жомарт Тоқаевтың тапсырмасына сәйкес, көптеген әскери қызметшілер борышын өткеру кезінде экономиканың нақты секторында талап етілетін жұмысшы мамандықтарды меңгерді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.